Sogod, Cebu, Philippines - Mga ahensya sa gobyerno dunay korupsiyon, kini ang gisulti ni Senador Allan Cayetano sa hearing sa senado sa Plea Bargaining Agreement sa giingong dakong pagpangawkaw sa pundo nga kuwarta sa Armed Forces of the Philippines. Gidugang pa sa senador nga nakapokus sila sa pag-imbestigar sa AFP busa angay nila kining humanon.
Si kanhi Koronel Gregorio Rabusa, budget officer sa AFP, nagtumbok kang Heneral Angelo Reyes, Heneral Roy Cimatu ug Heneral Diomedio Villanueva nga nakadawat og minilyon sa ilang pagretiro sa ilang katungdanan. Tiaw mong matud pa ni Rabusa nga nakadawat si Reyes og P50 milyones, samtang si Cimatu 60 milyones ug si Villanueva 160 milyones. Hesusmaryosep! Kun tinuod man ugaling kini, pagkabulahan nila samtang ang mga ordinaryong sundalo hapit gani dili makatukod og kaugalingong balay tungod sa kagamay sa ilang suweldo.
Ang nakapait pa gyod kay gikan sa singot sa magbubuhis nga mga Pilipino ang giingong gipangawkaw nga kuwarta. Ug ang unang nakatilaw sa hait nga mga pulong sa nag-imbestigar nga mga senador mao si Sekretary Reyes. Apan sama sa gituhoan na, gipanghimakak ni Reyes ug sa uban pang gitumbok nga mga heneral ang aligasyon kanila. Nadahig usab ang ilang mga pamilya sa giatubang nga imbestigasyon.
Wala makaagwanta si Reyes. Naghunos siya sa kaugalingon niyang kinabuhi pinaagi sa pagpusil sa iyang kaugalingon. Sa kamatayon ni Reyes, daghan ang mga espekulasyon nga nanggawas. May nag-ingon nga nagpakamatay si Reyes tungod sa kaulaw kay naapil na ang iyang pamilya. Dunay nag-ingon nga gibuhat ni Reyes ang pagkutlo sa iyang kinabuhi aron mahilom ang iyang nasayran. Duna usay nag-ingon nga naghikog si Reyes kay dili siya makahimo sa pagbutyag sa mastermind sa giingong dakong korupsyon sa AFP.
Si Senate President Juan Ponce Enrile miingon nga humanon na nila ang pag-imbestigar sa nahilambigit nga mga heneral aron ilang kahukman kun sad-an ba sila o dili. Human unya sa imbestigasyon, ang katawhan naghuwat sa mahimong hukom sa senado. Apil ko nga nanghinaot nga dunay positibong resulta ang maong imbestigasyon. Unta dili kini mahisama sa nangaging giimbestigar sa senado nga mga dinagkong pagpangawkaw sa kuwarta sa gobyerno nga walay nasilotan nga makasasala.
Kun tinuod nga nakapagawas si Rabusa og minilyon ka pesos alang sa pabawon sa giingong retiradong mga heneral unya wala gyod makadawat ang maong mga heneral, hain man diay mapunta ang maong minilyon ka pesos? Unta mahatagan kini og katin-awan sa hukom unya sa senado. (BANAT NEWS)