NGAYONG araw ng mga puso, kakaiba at nakakakilabot na kaso ang inilapit sa BITAG.
Isang krimen na nagawa dahil sa matinding bugso ng damdamin sa sobrang pagmamahal.
Sinabuyan ng asido ang isang beinte sais anyos na babae ng kaniyang dating kalive-in. Sunog ang buong mukha at likuran nito nang humarap sa amin.
Bago pa man mangyari ang krimeng ito, impyernong buhay ang kaniyang sinapit sa suspek na si Gaspar Maneja Jr.
Nagsimulang magbago ang magandang samahan ng biktima at suspek nang makipaghiwalay na ang biktimang si Ruby kay Gaspar Maneja.
Nagsimula itong saktan ang kinakasama na halos ikamatay ng biktima. Nagawa rin ng suspek na saksakin ang kaniyang sarili at humandusay sa kalsada maantala lamang ang napipintong hiwalayan.
Subalit sa desisyon na rin ng magulang ng biktima na hiwalayan ang kinakasama, natuloy ang kanilang paglalayo.
Ang siste, ilang buwan ang lumipas, rumesbak si Maneja. Sa harap ng Mandaluyong cockpit, pauwi na ang biktima nang mabilisang dumaan ang dalawang lalaking naka-motor, riding in tandem.
Saka siya biglang sinabuyan ng asido sa mukha, nakailag ang biktima at likuran ang unang nasabuyan. Subalit sa ikalawang pagsaboy, tinamaan na ang kaniyang mukha.
Ang mismong pasahero pa sa jeep ang nakapansing umuusok ang kaniyang mukha, dibdib at likuran. Ang krimeng ito, tinatawag na crime of passion.
(Abangan ang Ikalawang Bahagi)