Kumusta? Wala ba kaha’y mga tudlo nga napingkol kay nabuthan og mga rebentador kagabii sa pagsugat nato sa Bag-ong Tuig?
Maayo unta og wala. Ako bitaw mihunong na ko pagpabuto’g rebentador, ilabi na nga nakalimtan na ako nila ni higalang Julian ug Grace Pungasi.
Ang magtiayong Pungasi maoy nag-una sa negosyo pagpamuhat og mga rebentador diha sa Babag II, dakbayan sa Lapulapu.
Maayo ra usab nga wala na ko hatagi og pabuto nila ni Julian ug Grace kay mao kini ang nakapahunong nako sa pagpabuto’g rebentador.
Kuyaw g’yud tinuod ang pagpabuto og rebentador kay kun mabuthan ang imong kamot, pwerteng sakita.
Ikaduha, ang aso gikan sa rebentador o sa mga pyrotechnics sama sa fountain, makadaut sa atong panglawas.
Alang nako, sugaton nato ang Bag-ong Tuig pinaagi sa kamaya ug sa paghimo og kabag-ohan sa atong pagkatawo.
Kun kaniadto kita mga tapolan, magkinugihan na kita karon. Kun kugihan kita sa miaging tuig, dugangan pa nato ang kakugi karong tuiga.
* * *
Buyno, 15 na lang ka adlaw og saulogon na nato ang laing sumad sa pagka kaplag sa imahen ni Señor Santo Niño, ang suod nako nga higala.
Higala nako si Señor Santo Niño ug gani sa akong balay duna g’yud ko’y imahen sa gamhanang bata nga sama gayud og gidak-on sa orihinal nga imahen nga anaa sa altar sa Basilica.
Wala tingali kamo masayud nga daghan kaayo og natabang si Santo Niño kanako. Panahon sa akong kalisdanan, iya ako nga gitabangan.
Basta kay kun wala pa si higalang Santo Niño, ambot og unsa na kahay nahitabo sa akong kinabuhi. Kini maoy rason nga unya sa Enero 15, molakaw na usab ko subay sa taas kaayong rota nga agian sa prosesyon.
Ang rota nga giagian sa prosesyon niadtong miaging tuig, mao gihapon ang sundon karong tuiga. Gituyo kini aron nga makatag-katag ang mga tawo.
Gikan sa Basilica, mosubay ang prosesyon sa Magallanes, dayon sa Borromeo Street, liko sa tuo subay sa Leon Kilat.
Unya gikan sa Leon Kilat mosubay sa P. del Rosario Ext. ngadto na sa V. Rama Avenue, dayon liko sa tuo sa B. Rodriguez Street ngadto na sa Fuente Osmeña.
Gikan sa Fuente Osmeña mosubay ang prosesyon sa Osmeña Blvd. ngadto sa dalan Colon ug diritso na sa Basilica.
Kining maong taas kaayo nga rota sa prosesyon ako kining subayon kay ako kini nga saaran ngadto sa akong higala.
* * *
Nag-party si kanhi mayor Tomas Osmeña didto sa iyang balay niadtong Disyembre 20, apan wala imbitaha si Mayor Mike Rama.
Mao kini ang gibasihan sa uban nga ang panagbangi nila ni Tommy ug Mike may sagol na nga personalan.
Gitagsa-tagsa nako sila pagkuha og reaksyon apan pareho silang duha nga dili ganahan motubay sa paghisgut sa maong isyu.
Bitaw, nakasabot g’yud ko nga politika ang hinungdan niini. Gipahibalo na man gud ni Tommy nga mobalik g’yud siya sa pagka mayor.
Sigurado ko nga kun si Mike mopasalig ni Tommy nga usa ra siya ka termino pagka mayor, ug siya na ang modagan pagka kongresista, dili na sila mag-away.
Aw ingna ko bakakon. Kun ako ang kuhaan og sugyot, mas pabor ko nga si Mike ang mag-congressman kay usa siya ka abogado.
Si Tommy dili magsilbi sa kongreso kay dili man siya abogado. Naanad si Tommy sa trabaho nga pang-executive ug dili legislative.