Nagkalayo ang kalagot sa katawhan ngadto sa Korte Suprema nunot sa sunodsunod nga makalagot nga desisyon niini.
Kagahapon, makahuyhoy sa abaga sa mga Pilipino ang napaminawan nga balita nga si Hubert Webb ug laing lima ka mga akusado sa Vizconde massacre gi-acquit sa Korte Suprema.
Gawasnon na sila human sa 15 ka tuig nga pagkabilanggo.
Wala nay mahimo pa ang prosekusyon tungod kay ang acquittal sa korte sa mga akusado sa kasong kriminal dili mahimong i-apelar tungod sa doktrina sa atong criminal justice nga gitawag og double jeopardy.
Ang acquittal ni Webb ug sa lima ka kaubanan niini migawas human midesisyon ang samang Korte Suprema nga ‘unconstitutional’ ang Truth Commission nga gitukod ni Pres. Benigno Simeon Aquino III aron mo-imbestigar sa mga binuang sa nangaging mga administrasyon.
Sa maong mga kaso naila sa mga Pilipino unsa ang klase nga hustisya ang anaa sa Pilipinas.
Alang sa pamilyang Webb, usa ka dakong kadaogan ang acquittal ni Hubert kinsa usa sa mga principal nga akusado sa kasong pagpatay kang Estrellita nga asawa ni Lauro Vizconde, ug sa mga anak nila nga silang Carmela ug Jennifer.
Apan sa pamilya ug supporters sa mga Vizconde, usa kini ka dakong kagul-anan tungod sa ilang pagtuo nga wala mahatag ang tukmang hustisya alang sa inahan ug duha ka mga anak babaye nga nangamatay 19 ka tuig na ang nakalabay.
Wala na hinuon kitay mahimo tungod kay wala nay mohukom sa hukom sa Korte Suprema. Sa atong Batakang Balaod, silay giisip nga mga final arbiter sa atong balaod.
Sa balita nga akong nabasa, makaluluoy kaayong mi-react ang bana ug amahan nga si Lauro Vizconde nga nagtan-aw sa balita sa TV pag-acquitt ni Hubert Webb.
Nakatuaw intawon siya sa kaguol nga wala mahatagi og hustisya ang kamatayon sa mga mahal niya sa kinabuhi.
Kun akoy mangutana, kun dili si Hubert ug ang kanang lima niya ka mga kauban, kinsa man diay ang nagpatay sa asawa ug duha ka anak ni Lauro Vizconde?
Karon nga ang Korte Suprema nag-ingon nga dili si Hubert ug ang lima ang nagpatay, kinsa man diay?
Ambot kaha unsay gibati sa pito ka mga mahistrado sa Korte Suprema nga mimando sa pagbuhi kang Webb.
Ang atong Korte Suprema adunay chief justice nga si Renato Corona nga tinudlo ni kanhi Pres. Gloria Macapagal-Arroyo, ug adunay kauban nga 14 ka mga associate justices.
Sa 15 ka mahistrado, pito lamang kanila ang miboto sa pag-acquit kang Hubert Webb ug sa lima ka kauban niini.
Ang makahihibulong kay maayo kaayo pagkabahig sa mga mahistrado ang ilang boto aron mogawas gyud ang acquittal.
Upat mi-abstain - buot ipasabot wala sila mopartisipar sa diskusyon sa kaso ni Webb ug sa lima ka kauban. Samtang laing upat, mi-dissent kun misupak sa acquittal.
Kay upat ra man ang misupak sa acquittal, napilde kini sa gidaghanon sa miboto sa acquittal nga pito ka mahistrado.
Sa mga kasong nadesisyonan sa Korte Suprema nga akong nabasa, wala pa hinuon ko makasugat og tabla sa botasyon. Hehehe.
Ang nakapanlimbawot-balhibo sa balita, duha sa maong mga mahistrado nga miboto sa acquittal ni Hubert mga babaye nga mao silang Justice Ma. Lourdes Sereno ug Justice Conchita Carpio-Morales.
Unsa kahay gibati niining duha ka babayeng justices sa Korte Suprema sa ilang pagboto sa acquittal ni Hubert nga ang mga biktima sa kasong ilang gidesisyonan mga babaye?
Akong higala nga nakadungog sa acquittal ni Hubert nakakomentaryo, “Bay, ingon na gyud tingale ang sistema sa hustisya sa atong nasud. Mga dato ra ang giproteksiyonan sa balaod. Kay kun pobre pa to si Hubert, asa to pabuhian sa Korte Suprema!”
Bitaw no, seryoso kadto nga komentaryo sa akong higala.
Si Hubert ug lima ka kaubang akusado pulos mga adunahan.
Apan wala pa diay kamo makabantay sa dagan sa hustisya sa atong nasud, kinsa nabulahan ug kinsa ang naalkanse?
Ang tubag anaa ra sa kabus ug adunahan.
* * *
Lain na usab nga bahad - karon gikan na gyud ni Gob. Gwendolyn Garcia – ngadto sa mga sakop sa media nga mokomentaryo kalabot sa Balili scandal.
Ang bahad ni Gwen klaro kaayong pagpugong sa mga sakop sa media pagtuki sa publiko sa eskandalosong pagpalit sa maong luna sa dakong kantidad bisan ang halapad niini naglubog sa tubig dagat.
Nasayod hinuon ko nga dili mosaler kining “prior restraint” nga gihanig ni Gwen aron dili na mahibaw-an unsay sekreto nga naglimin niining transaksiyon nga gisudlan sa Kapitolyo.
Naguol gyud tingale ang gobernadora tungod kay ang publiko nagsugod naman og pangutana kun nganong gidalidali og palit sa Kapitolyo ang Balili property nga wala man kini maapil sa annual investment plan sa Kapitolyo.
Laing pangutana sa publiko nganong dili man ang Korean Electric Power Corp. (Kepco) ang mipalit sa luna kun ang tuyo niini labayan man kaha og coal ash gikan sa planta niini?
Sa sabot sa Kepco ug Kapitolyo nga $1 kada metriko tonelada nga coal ash, dili ba alkanse ang lalawigan sa Sugbo niini? Kini, tungod sa nahibaw-an sa uban nga $10 kada metriko tonelada diay ang tukmang presyo.
Kun $10, asa man mapunta ang $9?
Lisod kaayo tubagon ang maong mga pangutana.
Busa, walay gobernadora nga mosungasong sa pagtubag sa maong mga pangutana.