Salamat nga napul-an na’g lumlom ang Ombudsman sa ilang imbistigasyon sa nangalisbong anomaliya pagpalit ssa Kapitolyo sa Balili property didto sa Barangay Tinaan, Naga niadtong tuig 2008.
Sa katapusan gipagawas ra sa Ombudsman ang resulta diin namatud-an niini nga dunay igong basihanan aron i-upgrade ang fact-finding alang sa pormal nga criminal ug administrative investigation batok ni Gobernador Gwendolyn Garcia tungod sa pagsulod og kontrata nga disadvantageous sa gobyerno.
Gawas ni Garcia gilakip sa Ombudsman si Bise Gobernador Gregorio Sanchez ug ang tanang sakop sa Provincial Board tungod sa ilang paghatag og pagtugot sa gobernador nga paliton ang luna bisan kun ang dakong parte niini anaa ilawom sa dagat ug katunggan.
Wala sab makalingkawas ang mga sakop sa Provincial Appraisal Committee nga maoy gitahasan pagsusi sa luna pagsuta pilay tukmang market value niini sa wala pa baryi sa Kapitolyo ang yuta.
Bisan ang mga ultimong kawani nga igo lang gisugo sa ilang mga labaw pagsusi sa property gi-angin sa Ombudsman tungod kay nakigkunsabo kuno ni kanhi Bokal Juan Bolo ang gitumbok nga naggalgal ni Garcia aron paliton ang luna.
Naglibog ko unsay basihanan ni Graft Investigator Roderick Blazo lakip nilang Assistant Ombudsman Virginia Palanca Santiago ug Deputy Ombudsman Pelagio Apostol paglakip sa mga sakop sa Technical Working Group sa kaso.
Matud nila nakigkunsabo ang mga sakop sa TWG kang Bolo. Diin mang dapita nakigkunsabo ang mga sakop sa TWG? Kun wala mangatulog ang Ombudsman sa ilang imbistigasyon niining maong kaso, ilang makit-an nga mismong ang report sa TWG nagtataw nga ang yuta nga buot paliton sa probinsiya niadtong tungora tubigan, dunay fishpond ug katunggan. Kun nakigkunsabo pa ang TWG wala unta kini nila i-report.
Kun duna may nakigkunsabo ni Bolo, dili ang mga miyembro sa TWG kon dili ang naglangkob sa appraisal committee, mga sakop sa hunta probinsiyal nga kauban ni Bolo ug si Garcia.
Dili sayop sa TWG kun wala hatagi og bili sa appraisal committee ang ilang report. Busa kun duna may nakigkunsabo angayang didto magsugod ang imbistigasyon sa mga sakop sa CPAC ug dili sa TWG.
Dili kaha nga kabahin ni sa mas dakong pagpakigkunsabo sa mga opisyal sa Ombudsman sa mga gamhanang opisyal nga nalambigit sa maong kontrobersiya? Tuyoon pag-apil sa kaso ang mga ultimong kawani aron maoy ilang dakdakan sa kauwahian.
Mas sayon man gud pit-on ang ultimo kaysa mga gamhanan. Hinaut nga dili ni apil sa drama sa mga opisyal sa Ombudsman nga kunohay ilang gikasohan apan ang tinud-anay nga target mao ang mga ultimo.
* * *