Bakit ba may langgam at ano ba sila
ano ba ang misyong inaangkin nila?
Kanilang gawai’y waring naiiba
na sa mundong ito sila’y nakilala?
Katulad ng tao langgam ay may buhay
pero kakaiba kanilang paggalaw;
Kay liliit nila at nagsisigapang –
sa lupa’t kung minsa’y sa loob ng bahay!
Sa taong patay na sa bayan at bukid
naroon ng langgam na namumutiktik;
Kinakagat nila sa lahat ng panig –
kung buto na ito ay saka aalis!
Tambak ng basura’t natapong asukal
naroroon sila kahi’t magdamagan;
May mga langgam na nag-aakyatan
hanggang sa kisame at mga bubungan!
Bahay na malaki at bahay na pawid
paggapang ng langgam ay nakakagalit;
Pula man o itim ating winawalis
at sinusunog pa sa laki ng inis!
May reyna ang langgam – ayon sa istorya
hindi sinusuway mga utos niya;
Sa araw at gabi sila’y pila-pila
at nagsasalubong pagkain ang dala!
Nakapagtatakang sa baha at bagyo –
hindi nalulunod ang langgam sa mundo;
Lindol at tsunami dumating man ito
itong mga langgam ay wala na rito!
Kay napag-isip – ang misyon ng langgam –
pinupulbos nila ang lahat ng bagay;
Dambuhalang hayop, tao at halaman
kinakain nila buhay man o patay!
Maliit ang langgam pero may gawain
na dapat gampanan sa daigdig natin;
Diyos na marunong nang sila’y likhain
nakatoka sila na tayo’y pulbusin!