Dako akong bilib sa hut-ong sa mga bag-ong bokal sa Cebu Provincial Board. Kini tungod sa ilang gipakitang gilas niining unang mga bulan sa ilang termino. Ambot kun insakto ba kaha kun tawgon sila’g nagpakitang gilas.
Una na niini mao ang pagpasar sa usa ka ordinansa nga nagdili sa lingam massage service sa lalawigan. Ang maong ordinansa gipasaka ni Bokal Agnes Magpali human sa mga reklamo sa ka law-ay niining maong klase sa masahe.
Hinuon, isip usa ka Kristiyanong nasud, walay pagsupak ang katawhan sa pagdili na sa lingam sa probinsiya. Dili kana ikatingala tungod kay sukwahi kini sa moralidad ilalum sa pagtulon-ang Kristiyanismo.
Apan adunay misuporta usab sa maong klase sa masahe. Ug sila dili lamang kadtong mga suki na sa lingam kondili kadtong adunay nakit-ang ikaayo sa maong masahe.
Apan dili na kita maghisgot niana. Dili ako eksperto nga mobatbat sa kaepektibo sa panglawas sa tawo sa maong masahe. Na-ban na ang maong klase sa masahe ug bahala na ang mga proponent nga makigbisog sa legalidad niini sa mga mata sa mga Sugboanon.
Hinuon aniay usa ka bokal nga sa akong tan-aw nagdala og kaalegre sa Hunta Probinsiyal karon. Ug kini walay lain kondili si Bokal Arleigh Sitoy, ang kanhi mayor sa lungsod sa Cordova.
Una pa lamang kini nga termino ni Sitoy sa Hunta. Ug daghan ang nakuratan sa iyang gipakitang gilas pinaagi sa pagpasaka og mga balaudnon nga dili malikayan nga daghan ang magkatawa.
Sa una niyang proposal, gusto ni Sitoy nga adunay lahing comfort room dinhi sa lalawigan ang mga sakop sa third sex o kadtong mga bayot ug tomboy. Miani kini og pipila ka reaksiyon gikan sa mga Sugboanon.
Sa iyang resolusyon, matud ni Sitoy nga iyang nakita nga daghan sa mga bayot ug tomboy ang na-discriminate sa higayon nga mogamit sila sa comfort room sa mga establisimento. Ug niya pa nga kinanahanglang adunay privacy kining maong mga sakop sa third sex.
Apan daghan ang mirebinta niini. Wala kuno sila’y nakitang ikaayo niining maong proposal. Samot hinuon nga ma-descriminate ang mga bayot ug tomboy gumikan kay naa na man hinuon silay kaugalingong kasilyas.
Ug usa ka klase sa diskriminasyon batok sa mga bayot ug tomboy kun magbutang og laing kasilyas alang kanila, matud pa sa mga mikontra sa maong lakang ni Sitoy.
Hinuon ang maong proposal mora’g naghagok na man didto sa hawanan sa Hunta. Ambot lang kun mapasar ba gyud kini sa hingpit. Hinuon andam usab si Sitoy nga depensahan kini.
Ang labing ulahing lakang ni Sitoy sa Hunta mao ang pag-file og resolusyon nga naghatag og warning ngadto sa mga hilig mokaon og chicharon. Gusto sa maong bokal nga pahimangnoan sila sa ka piligro nga dala niini sa maong pagkaon.
Ang mao niyang proposal iyang gibasi sa iyang kasinatian diin hapit na kuno siya mamatay human mikaon og usa ka kilong chicharon. Kay kun napun-an pa kuno, matud pa ni Sitoy, ang chicharon nga iyang gikaon niadtong tungora, hayan nga patay na kuno siya karon.
Apan wala mahimuot si Gobernador sa maong proposal ni Sitoy. Dali kaayong nakadepensa ang gobernador sa mga chicharon nga gibuhat dinhi sa Sugbo, ilabina didto sa Carcar.
Alang kanako, dili na man siguro kinahanglan nga magmugna pa’g ordinansa alang lamang pag-warning sa mga mokaon og chicharon sa ka piligro sa kolesterol nga dala niini. Kini tungod kay nahibalo na kita sa dangatan niadtong kusog mosubad niini.
Adunay daghang problema nga giatubang ang probinsiya nga angay unahon ni Sitoy kay sa chicharon. Mas maayo pang iyang itugyan sa Department of Health ang paghikotar sa isyu sa chicharon.
Usa pa, mas maayo pang dili na lamang usab mokaon si Sitoy og dugang chicharon aron magsilbi siyang sumbanan niadtong mga adunay sama kaniya’g balatian.
* * *
Email: yacilam@yahoo.com