Sa kapanahonan sa atong Ginoo, nahimong mahinungdanon kaayo ang usa ka bangkite sa kasal. Dinhi ang usa ka pagdapit ang maglangkob ning mosunod nga mga sector. Inner Circle (Mga igsuon), lineage Sector Kaparyentihan), Social Sector (Mga higala ug mga adunahan sa dapit). Nga sa ato pa, ang Bangkite sa Kasal ang mag-ila sa matang sa tawo nga gidapit diha sa dapit diin siya naglingkod. Mao kini ang hinungdan kun nganong daghan ang mangita gyud sa pinakamaayo ug pinasidunggang dapit sa maong kombira. Gigamit sa Ginoo kining maong talan-awon sa pagtudlo nga gikinahanglan ang pagpaabot sa usa ka dinapit nga siya maoy palingkoron sa maayong dapit sa nagdapit kaniya, inay nga siya mao ang magpahimutang sa iyang kaugalingon.
Usa sa mga kinaiya nga maghulagway kanatong mga Pilipinong Katoliko mao nga kita ang sa kanunay nakasentro usab sa pagkaon ug kombira. Gani, kaniadto ug karon dili gyud ikalimod nga anaa nato ang pagpinig sa atong mga dinapit. Anaa gihapon ang power differential diha sa atong pagbutang sa mga presidential tables kang kansang mga potahe mas lamian kun itandi sa talad nga gisaw-an sa kadaghanan. Imbis ang kan-anan ang nahimong talad sa pakiglambigit, nahimo naman hinuon kining talad sa pagkilatis sa jewels sa tawong dunay salapi, gahom, ug kasikat kun itandi sa mga tawong dili suod ug anaa sa ubos nga hut-ong lamang sa katilingban. Hinuon, dunay maayong epekto man pud niini. Kay unsaon daghan man sab gud ang dapiton ang mopakita sa ilang kahakog ug kasegurista ug kamapahimuslanon sa kaayo sa nagdapit kanila. Sa kataposang adlaw, ang Dios dili magsapayan sa bulok sa panit o ekonomikanhong estado ni bisan kinsa nga iyang ikasalo sa iyang talad sa Ginghariang Langitnon. Mas haom nga diha sa atong paghikay mas makahuloganon pa nga mahurot ang atong giandam tungod kay atong gipaambit sa walay makaon kaysa paghimo niini nga mapan-os gumikan sa atong kapilian og mga tawo. Kun ikaw nga gidapit, ayaw hunahunaa lamang ang imong kaugalingon kondili hasta usab ang uban.