(Ikaduha sa duha ka hugna)
Ang gobyerno mohunong lamang una kuno sa pag-angkat og bugas didto sa gawas sa nasud tungod kay aduna pay daghang nangabahong pundo sa bugas sa mga bodega sa National Food Authority. Kining maong solusyon dili tubag sa suliran.
Ang kadaghan sa bugas nga giangkat sa gobyerno bunga sa kahadlok sa kagamhanang Arroyo kaniadto nga mahutdan ta og bugas nga moresulta unya sa krisis sa bugas. Ang paghunong sa pag-angkat og bugas dili maoy tubag sa suliran ug kun makatubag man kini kutob lamang karon ug dili kini makalahotay.
Ang pag-angkat og bugas dili usab kini makahatag kanato og kaseguroan nga dili ta mahutdan og bugas. Kun gusto man sa kagamhanang Aquino karon nga dili na ta mabalaka sa supply sa bugas angayang palig-onon niini ang sektor sa agrikultura.
Ang agrikultura dili lang tubag sa kakuwangon sa pagkaon kun dili tubag usab kini sa suliran sa kawad-on busa kini ang dapat palamboon og maayo sa atong gobyerno. Kinahanglan nga tinud-on na sa gobyerno ang iyang paghatag og suporta ngadto sa mga mag-uuma.
* * *
Ako diay’ng pasalamatan ang akong mga tigpaminawan sa tulomanong Morning na Cebu nga inyong mabati matag 4:30 - 6:00 sa buntag ug Gerry Auxilio On Board Saksi Evening Edition nga inyong mabati matag 6:30 - 9:00 sa gabii, Lunes hangtod sa Sabado sa DySS Super Radyo Cebu tungod sa ilang paghimong numero uno sa maong duha nato ka mga tulomanon sigon sa pinakauwahing survey nga gihimo sa Neilsen nga gipahigayon dinhi sa Sugbo. Kaninyong tanan daghang salamat.