CEBU, Philippines – Cebu City sama sa usa ka maanyag apan...
Nahinangop kaayo ang mga Sugbuanon sa plano sa Super Beautification Council nga himoong sama sa Paris , France katahom ang dalan Osmeña Boulevard aron labing modugok ang daghang mga turista dinhi sa dakbayan.
Gawas sa maong dalan daghan kaayong lugar ning dakbayan nga maayo kaayong tan-awon kun isalida na sa mga TV ads ug ipasud-ong didto sa nagkalainlaing lugar sa gawas sa nasud aron sa pagdani sa mga langyaw ug bisan taga ubang probinsya ning nasud nga mosuroy sa dakbayan sa Sugbo.
Apan ang labing tinuod kitang mga Sugboanon ilabi na ang taga media maoy labing nasayod kun unsa kakuyaw suroyan kining dakbayan ilabi na sa panahon sa kagabhion.
Niadtong usang kaadlawon nasaksihan sa Banat News kadtong usa ka taga dakbayan sa Ormoc nga misuroy sa Colon kay nangita siya og painit gikang midunggo alas 4:00 sa kaadlawon sa pier ning dakbayan.
Apan pag-abot ni Bidasto Gorindola, 35, ulitawo sa eskina Colon-Pelaez kanang may sinehan unya may police outpost nga katulganan sa mga adis-adis, gisugat siya og usa ka babaye nga mihangyo nga magpakighilawas.
Kumo kay wala siyay kuwarta ug wala usab siyay gana, namalibad siya, apan gipangayoan siya og kuwarta, mibalibad gihapon siya hangtod nga miduol ang upat ka bugaw nga lalaki ug gitabangan siya'g kulata, hinungdan nga miwingig ang iyang walang apapangig ug misudlot ang dugo sa iyang ilong ug walang dunggan.
Ingon niini kakuyaw ang mga nagkalainlaing dapit ning siyudad nga alang sa mga polis lisud na makontrolar. Hilan kaayo ug kun mosuroy ka sa sa panahon sa kagabhion wala nay kasigurohan ang imong kinabuhi tungod sa mga mangtas kaayong adis-adis nga walay pagkapuo.
Busa alang sa ubang tigpaniid, sama ra sa usa ka maanyag nga babaye ang dakbayan sa Sugbo nga guwapa kaayo ang panagway apan ang ilawom gi-AIDS na diay. (BANATNEWS)