Kun may P500,000 ang Mactan Cebu International Airport Authority (MCIAA) nga pabawon alang sa retiradong direktor sa Department of Tourism (DOT) sa Central Visayas nga si Dawnie Roa, nganong wa man kagahin ang board of directors og kuwarta pag-ayo sa gubaon nga mga pansayan sa tugpahanan, paglimpiyo nila ug pagtino nga di mangalisbo?
Kun tinuod ang pangugat ni General Manager Danilo Francia nga may gahom ang board ubos sa MCIAA Charter paghatag sa benepisyo ngadto ni Roa, nganong nataligam-an man sa board ang mas batakan nilang gimbuhaton, nga gimando sab sa charter, pagpalambo sa kahimanan sa tugpahanan aron nga makadani og dugang lokal ug langyaw nga mga turista?
* * *
Mga tigpaminaw sa Arangkada sa DYAB Abante Pa, Bisaya nipadayag sa ilang kahimangod sa masulub-on nga kahimtang sa mga pansayan ug ubang kahimanan sa tugpahanan: Way tubig kon brownout, napayok nga mga inuduro, basurahan ang gihimong balde sa tubig, botelya sa mineral water ang gisudlan sa sabon sa kamot, nangapakpak nang pintal sa mga pultahan, nanglagom nga mga kisame, naukal nang carpets, nagkabulingit ug nangliki nang sawog ug labihan kaalimuot nga palibot.
Maong may sukaranan silang maningil: Diin man padong ang dagko kaayong terminal fee sa matag pasahero? Gitagana na bang daan nga pabawon sa kaubanan ni Roa sa MCIAA board nga nangahadlok nga di na itudlo pagbalik ni Pres. Noynoy Aquino?
* * *
Laing gipaingnan sa kuwarta sa MCIAA mao ang P50 milyones nga MIP Lounge nga gidalidali pagtukod alang sa Asean Summit niadtong 2007: Nalata nang kisame tungod sa kanunay’ng pagkabasa sa uwan, nangliki na ang bungbong nga hinimo lang sa plywood ug nangagusbat na ang mga lingkoranan nga napiksan sab sa uwan.
Nagpakabana nga mga kawani sa MCIAA nihatag og dugang kasayuran sa laing gipaingnan sa kuwarta sa mga magbubuhis: P120,000 matag direktor sa MCIAA atol sa pagpirma sa Collective Negotiation Agreement; ug P40,000 matag direktor niadtong Disyembre.
* * *
Si Roa nakalingkod sa MCIAA board ug nagdawat og P30,000 matag buwan (P15,000 matag tigom) isip representante ni kanhi Tourism secretary Ace Durano. Silang duha igo lang sang nagrepresentar sa DOT. Si Roa nakadawat na sa makabuhong nga retirement benefits gikan sa DOT. Ang pagdawat niya og dugang retirement benefits gikan sa MCIAA dako na kaayo nga pamintaha.
Kun may kaikog pa unta silang Francia ug kaubanan sa MCIAA board, hagbay ra unta nga nisumiter og courtesy resignation paghatag og kagawasan sa bag-ong pamunoan pagpili og ikapuli nila. O pagpabilin nila. Mao diay nga gisalikway ang batakan nga lagda sa kaikog. Mahimo nga gitilok diay ang inihap nalang nga mga adlaw sa pangatungdanan aron pagtiti sa bisan unsa nga nahibilin sa panudlanan sa MCIAA.
* * *
Email:leo_lastimosa@abs-cbn.com