Mipakita og kakugi ang bag-ong mga napiling opisyal sa nasud sa pormal nga pagsugod sa ilang opisyal nga mandato kagahapon Hunyo 30 sa kaudtohon.
Usa niini si Presidente Benigno Simeon “Noynoy” Aquino III. Human siya nanumpa atubangan ni Supreme Court associate justice Conchita Carpio Morales, si Aquino ug iyang mga miyembro sa kabinete midayon ngadto sa Malacañang ug wala palabya ang panahon, nag-meeting gilayon sila.
Daghang trabahuon ang bag-ong administrasyon ni Aquino.
Apan maayong tilimad-on ang gipakita nila sa mga tawo nga dili gyud sila magpaligoyligoy karon nga sila na ang gisaligan sa mga Pilipino pagsulbad sa mga suliran nga gisagubang sa nasud.
Bisan mga “recycled” ang iyang mga miyembro sa kabinete, angayan ipakita ni Aquino nga mas lahi kining iyang administrasyon karon ug ang gipamili niyang mga kalihim adunay igong katakus pagdumala sa tagsatagsa nila ka departamento.
Ipamatuod usab ni Aquino ngadto sa mga Pilipino ang maisugon niyang pamaagi pagpakigkumbate batok sa kalisod pinaagi sa pagpuhag sa mga kurakot sa gobyerno.
Ang mga lokal nga opisyal nagsugod na usab sa ilang opisyal nga mandato sa tagsatagsa nila ka lokal nga kagamhanan kagahapon. Mga panghinaot usab sa katawhan nga sagupon sa mga lokal nga opisyal ang mga birtudes ni Aquino sa pagdala sa renda sa pangagamhanan aron sa ingon adunay usa ka direksiyon ang lokal ug ang nasyonal nga kagamhanan.
Kun usa lamang ang direksiyon sa pamunoan sa nasud, makab-ot sa tanan ang mga pangindahay ni Aquino nga ipatuman ang dakong kausaban ug reporma sa nasud aron mo-uswag kini sa unahan.
Maayong hatagan ang Aquino administration og walay duhaduha nga suporta sa mga Pilipino!