Si Renato Corona Chief Justice na niadtong adlaw’ng Lunes Mayo 17, 2010 samtang si Noynoy Aquino dili pa pangulo, wa pa gani siya iproklamar nga mananaug nga pangulo ug kun iproklamar man nga pangulo unya pa siya magsugod sa iyang trabaho sa udtong tutok sa petsa 30 sa bulan sa Hunyo.
Busa kun dili ilhon ni Noynoy Aquino ang pagka Chief Justice ni Renato Corona sa Korte Suprema nanghilabot siya sa pagka independente sa hudikatura ug mahimo unya kining gamot sa dako niyang problema. Way mahimo si Noynoy Aquino kun gitudlo man ni pangulong Arroyo si Renato Corona nga Chief Justice sa Korte Suprema tungod kay gahum kini sa pangulo. Gawas niini gitugot pa gayod sa Korte Suprema ang iyang pagtudlo og bag-ong Chief Justice nga mohulip ni Renato Puno.
Puyde ra unta ni pangulong Arroyo nga dili motudlo og bag-ong Chief Justice aron ang magsunod kaniya mao nay mohimo niini pero unsaon man na nga di man nato ikalimod nga hakog ug hangol sa gahom sa pagtudlo kini si pangulong Gloria Macapagal Arroyo.
Kun magmagahi si Noynoy Aquino sa iyang baruganan sa dili pag ila sa pagka Chief Justice ni Renato Corona, iyang gisugdan og suliran ang iyang kagamhanan ug dili kini maayong lakang alang sa usa ka kagamhanang gusto og kausaban.
Sa mga inila ug banggiitang mga abogado nga nagpalibot ning atong umaabot nga bag-ong pangulo sa nasud Noynoy Aquino tambagi tawon ninyo siya aron di ta magkaguliyang ug kun dili patoo ipa-check up sa iyang psychologist.