Kun maghisgut na gani og media ug pari ang mosantop dayon sa atong hunahuna mao nga ang usa ka pari namantala o kaha nabalita tungod sa mga eskandalo o mga isyu nga nalambigitan.
Apan ning panahona ang atong Santo Papa ning World Day of Communications ang nagdapit sa mga kaparian aron paghatag og laing pagsabot sa media.
Ang media himoon untang usa sa mga epektibong paagi sa pag-ebanghelyo sa kultura ug katawhan ning atong kapanahonan. Pinaagi sa paghimo ning maong kapasikaran, mas mahimong sayon ug paspas ang pagmantala sa maayong balita ginamit kining maong mga kahimanan.
Himoon unta si Kristo nga maoy unod ug sukaranan sa matag higayon nga ang usa ka ministro manginlabot sa mga isyu sa media. Hinaut unta nga mamahimo kining sinugdanan sa usa ka hamtong ug balanseng kalambigitan tali sa media ug sa kaparian.
Kini tungod kay usa ra man ang atong tumong ug kini ang pagsangyaw sa matuod ug sa pagbalita sa maayo ug makabuhing mga taho.