Unsay nahitabo sa hazard pay sa mga magtutudlo nga nadistino sa mga bukirang tunghaan dinhi sa lalawigan sa Sugbo? Nganong tulo nalang ka tuig wa man gihapon makakubra ang mga kabus nga mga maestra ug maestro?
Sa miaging semana midangop nako ang pipila ka mga magtutudlo sa Cansuje National High School tungod kay tulo na ka tuig wala ihatag sa Department of Education ang ilang hazard pay nga tag P2 mil matag buwan.
Ang hazard pay usa ni ka matang sa insentibo sa mga magtutudlo nga atua madistino sa kabukiran tungod kay dili tiaw ang kalisod ang madistino sa bukid. Lisod ang sakyanan nga kinahanglang maghabal-habal aron maabot ang bukid nga tunghaan.
Ang uban mapugos nalang gani pagpanguyab og habal-habal driver aron makalibre sa plete samtang ang uban naminyo nalang gyud og habal-habal driver. Hain naman ang gahin sa hazard pay sa mga magtutudlo sa kabukiran? Akong masabtan og malangan lang ang pag-release niini og pipila ka buwan apan kun moabot na og tinuig duna nay problema diha sa DepEd.
Dili ko motuo nga walay pundo alang niini tungod kay matag tuig dunay gahin ang DepEd sanglit kabahin ni sa national budget. Duha ray posibling nahitabo sa pundo alang niini, kun wa ibulsa sa mga buaya nga mga opisyal sa DepEd posibling gi time deposit sa mga kukhan nga opisyal aron makatigom og interest.
Kaloy-i intawon ninyo ang mga kabus nga mga magtutudlo, ayaw intawon daginota hasta ang gamay’ng kantidad alang nila.
* * *
Angayang pagakpakan si Bise Mayor Michael Rama sa iyang mando ngadto sa iyang mga kauban sa Bando Osmeña Pundok Kauswagan nga langkaton ang ilang mga campaign posters nga anaa mahimutang sa mga lugar nga wala itudlo sa Commission on Elections isip common posters area.
Matud ni Rama nga polisiya ni sa ilang kahugpungan nga mosunod sa balaud. Pagpakita sa ilang kamatinud-anon giawhag ni Rama ang mga botante nga dili butahan ang ilang mga sakop nga wa mosunod sa balaud.
Dalaygon ang maong kamanduan apan labaw sa tanan mas maayong si Rama maoy mangulo sa pagtangtang og una sa iyang mga posters nga anaa sa mga poste ug mga pribado nga mga koral.
Dili ba ang gi-designate sa Comelec nga common posters area ang mga barangay hall ra man? Klaro sab ang resolution sa Comelec nga kinahanglang magbutang og ilang kaugalingon nga mga butanganan sa posters ang mga kandidato.
Gidili sa lagda sa Comelec ang pagpapilit sa mga posters diha mismo sa mga bongbong sa barangay hall. Pero nganong daghan man sa mga posters sa BOPK lakip sa posters ni Rama ang anaa sa mga bongbong sa mga barangay hall?
Mas maayong ipakita ni Rama sa buhat ang iyang mga pulong aron motoo ang publiko nga siya matinud-anon.
Ang problema sab sa Commission on Elections tungod kay bisan tataw kaayo ang mga paglapas sa lagda sa kampanya apan padayong nangiyogpos sa ilang mga bukton ang maong ahensiya.
Igo lang moingon ang mga opisyal sa Comelec nga dili sila makahimo og aksiyon kun way pormal nga reklamo nga isang-at sa ilang buhatan. Usa ka taphaw nga rason aron pagtabon sa ilang kainutil paggukod sa mga malapason nga mga kandidato.
* * *