Nakita sa mga Pilipino ang kakugihan sa Sugboanong si Atty. Clarence Paul Oaminal, ang vice chairman sa Dangerous Drugs Board (DDB), ilabi na ang pagpuhag sa mga sindikato sa ilegal nga drugas.
Apan sa tuman niyang kakugi paggukod sa mga drug-lord, nakalimot na siya sa iyang kaugalingon; wala na siya makabantay nga ang mga gamhanan ug sapian nga sindikato sa drugas milipot aron pagbukbok sa iyang bukobuko.
Si Oaminal una nga biktima sa “narcopolitics” nga nakagamot na sa sistema sa politika sa nasud; nga makapila na nga eleksiyon mitabang pagpadaog og mga kandidato.
Apan sama sa usa ka buotan nga sundalo, wala mamugos si Oaminal nga ipabilin sa dihang giilisan siya sa “silingan” ni Pres. Arroyo nga si Rommel Garcia.
Nagtuo hinuon ang Banat News nga si Oaminal dili mo-undang sa iyang kawsa pagpuhag sa ilegal nga drugas pinaagi sa pagpaambit sa iyang mga nahibaw-ang programa ug paagi pagpakiggubat niini.