Naunsa naman ta ini? Mora man og isog na kaayo ta. Bisag unsa na lay masulod sa atong utok pagsupak sa kabubut-on sa Ginoo, kana kun mituo pa tag Ginoo.
Maoy hinungdan nga daghan kanato di na motuman sa kasugoan sa Simbahan ug maghimo nag kaugalingon nga mga lagda.
Karong bag-o, usa ka dakung opisyal sa gobyerno, nangunay gyud pagpang-apod-apod sa condom, kay matud pa, dili kini dautan, in fact, makatabang kini pagsumpo sa sakit sa kalalaken-an nga magduwaduwa sa kababayen-an, ingonman, sakit sa kababayen-an nga mosugot duwaduwaan.
Alang ning maong opisyal, ang condom maoy sulbad niining tanan. Sa ato pa, sige ang pakighilawas outside of marriage, dili kini dautan, sige ang pre-marital sex, dili usab kini dautan, basta mogamit lag condom. Ngiga niya no? Naghimo siyag kaugalingon nga lagda. Lagmit, ang iyang banay, ang iyang bana, ang iyang mga anak ug mga apo, maoy unang mituman sa iyang lagda.
Anyway, niay pundok nga kono mga devout Catholic sila, apan, uyon sila sa sugyot nga butangan og expiry date ang kaminyoon, kay kono nganong paantuson man ang mga minyo nga sige lag lalis ug di gyud magkasabot?
Sa ato pa,buot nilang wagtangon ang “till death do us part,” ug ang sugo sa Ginoo nga “let no man put asunder.” Nangaunsa naman lagi ta ini uy? Nanubra na ang atong ka-bright, nga maghimo na kitag kaugalingon nga mga patakaran, ug isalikway na ang kabubut-on sa Ginoo!
Lalim, buot nilang dunay expiry date ang kaminyoon. Alang sa tinuod nga Katoliko, meaning, Katoliko nga motuman sa kasugoan sa iyang Simbahan, bisan kun wa siya ganahi sa iyang parish priest, ang kaminyoon gihimong balaan ug malungtaron sa atong Ginoo. Wa moingon ang Ginoo nga kun pul-an na kita sa atong asawa o bana, ipa-expire ang marriage contract.
Tan-aw nako, nag-intensify na si Satanas sa iyang operation. Tinuod gyud ang giingon nga Satan never sleeps!
Unya, samtang di matulog ang Yawa, kita nagtanga lang. Usahay gani, atong ihatag ngadto sa Yawa ang hingpit nato nga cooperation. Kontrahon nato ang atong Simbahan ug adto na kita makig-alayon sa evil.
Unsa man Dro, uyon kang butangan og expiry date ang kaminyoon?