Dili angay ikahadlok nilang Senador Mar Roxas ug Franklin Drilon ang “fatwah” nga giisyu ni Imam Jamil Yahyah batok kanila ug kang kanhi Pres. Joseph Estrada.
Utokan ug makamao motan-aw sa saktong basehan ang mga Muslim sa nasud, ilabi na sa Mindanao, busa motimbangtimbang sila kun angay ba nga sundon ang giisyu nga “fatwah” ni Yahyah nga sakop sa Bangsamoro Supreme Council of Ulama nga “identified” sa Moro Islamic Liberation Front (MILF).
Mo-uyon hinuon ko ni Yahyah nga angay tawgon nga “enemies of Mindanao Muslims si Estrada.
Si Estrada miisyu og “all-out war order” batok sa mga rebeldeng MILF niadtong Hulyo tuig 2000 ug gipasulong niini sa kasundalohan sa Armadong Kusog ang Camp Abubakar.
Human mailog ang Camp Abubakar, nagpista si Estrada uban ang mga sundalo nga dili Muslim. Dakong bugalbugal ang gihimo ni Estrada nga nakigpangaon og lechon nga baboy uban sa mga sundalo nga dili Muslim sulod sa madrasah o Islam school.
Nasayod si Estrada nga balaang lugar ang madrasah ug dinhi niining lugara ginadili ang baboy. Apan nganong nakaako man si Estrada pagbugalbugal sa mga Muslim pinaagi sa pagmantsa sa madrasah pinaagi sa pagpangaon og baboy?
Dili lang kay kini lang, ang kasundalohan nga gisugo ni Estrada pagsulong sa Maguindanao misulong sa mga kampo ug giapil og guba ug sunog ang mga mosque nga balaang lugar alang sa mga kaigsuonan natong mga Muslim.
Gihimong depensa ni Estrada sa iyang gibuhat mao ang kagustohan niya nga maangkon na sa mga Muslim sa Mindanao ang kalinaw.
Makaangkon ba diay og kalinaw ang mga Muslim sa pagpasulong ni Estrada sa Camp Abubakar bisan adunay nag-ung-ong nga peace talks? Unya makahatag ba diay siya og kalinaw ngadto sa mga Muslim pinaagi sa pagkaon og lechon sulod sa madrasah?
Sibo lamang nga pagatawgon si Estrada nga kaaway sa mga Muslim.
Apan nganong karon lamang giisyu ang fatwah nga hapit na ang presidential election?
Apan dili ko kumbinsido kun i-apil si Mar Roxas ug Drilon kun i-apil sila sa fatwah tungod lamang sa pag-contest nila sa Memorandum of Agreement on Ancestral Domain (MOA-AD) nga magbulag sa Mindanao gikan sa Pilipinas.
Kun ako'y Roxas o Drilon, dili usab ako mopirma sa maong MOA-AD nga wala masubay sa proseso, nga wala'y kunsultasyon sa mga Pilipino, ug gidalidali lamang sa pagpatuman sa tago tungod sa interbensiyon nga gihimo sa Malacañang.
Tinuod nga alang sa kaayuhan sa mga kaigsuonan natong mga Muslim sa Mindanao ang MOA-AD. Pero, adunay proseso nga sundon ug dili maayong lakang ang pagbahinbahin sa Pilipinas. Kay sa Pilipinas, ang Muslim, Bisaya ug Tagalog pulos mga Pilipino.
Ang gihimo ni Estrada makapakagot sa bag-ang sa mga buotan nga Muslim, apan ang gihimo nilang Roxas ug Drilon masabtan lamang sa mga Muslim.
* * *
Milutaw na ang tinuod nga status sa oposisyon sa dakbayan sa Lapulapu. Katag, saag, away ug panag-unayay ang tinuod nga sitwasyon sa grupo nilang Efrain “Jun” Pelaez ug Junard “Ahong” Chan.
Niadtong miaging semana, si Ahong giduso ni kanhi Sen. Sonny Osmeña nga maoy iyang kandidato pagka-mayor sa dakbayan sa Lapulapu batok kang Paz Radaza, asawa ni incumbent Mayor Arturo “Boy” Radaza kinsa kandidato usab pagka-kongresista sa Lapulapu lone congressional district.
Apan inay makahatag og kaayuhan ni Ahong, ang dili maayong standing ni Sonny sa politika nakahatag hinuon og mantsa sa iyang politikanhong damgo sa Lapulapu.
Misamot pa gyud kini karon nga gi-away siya ni Jun Pelaez tungod sa paghatag niini og impression sa mga Oponganon nga si Ahong maoy tinuod nga oposisyon sa Lapulapu.
Bitaw kinsa man gyud Sir Jun?
Tinuod man nga si Jun Pelaez ang nagsugodsugod og pakigbatok sa pamunoan ni Radaza.
Si Jun Pelaez maoy mihiusa sa mga tawo nga alyado sa oposisyon. Naghago siya og pakigkita sa mga lider sa oposisyon aron planuhon ang ilang pagpakigsakbang sa mga Radaza.
Si Ahong kaniadto alyado man ni Radaza.
Gani, adunay mga lider sa mga sitio nga mitawag ni Ahong og “walay batasan” ug “engrato” kay lagi misungag na kini sa mga Radaza nga maoy naghimo niyang tawo diha sa politika sa Lapulapu.
Sayop ang pagtuo ni Ahong nga ang pagbulag niya sa mga Radaza makatabang sa iyang politikanhong damgo, tungod kay ang mga Oponganon dili mosapwang sa tawo nga dili gani makamao mopasalamat sa tawo nga nagtabang kaniya nga mahimong inila ug makausa mihimo kaniyang konsehal dinha sa Lapulapu.
Ang gihimo ni Ahong maoy nakapabungkag sa oposisyon sa Lapulapu.
Nagtuo hinuon ko nga dili na magkahiusa ang oposisyon sa Lapulapu karon nga milutaw na ang ngalan ni Jun Pelaez, ug samot na nga dili usab magpalupig si Ahong Chan.
Kun mao kini ang sitwasyon, tanan nga oposisyon sa Lapulapu mamagpag karong Mayo 10 nga eleksiyon.
* * *
Ang pagpangguba ni Mayor Tomas Osmeña og mga basketball boards sa kabarangayan, ilabi na sa bukiran, dili makatabang sa iyang laraw nga mag-kongresista sa south district sa siyudad.
Buhat sa usa ka “terorista” ug “diktador” ang pagpangguba.
Dili igo nga rason nga ang basketball goal gisab-itan og mga boards nga gikan ni Jonathan “Atan” Guardo.
Ang mga tawo mismo ang misulti nga dugay na silang nag-request og basketball boards sa Cebu City Hall, apan wala matagad sa hilabihang kataas nga burukrasya sa pamunoan ni Tomas.
Dili angay pakasad-on ang mga tawo nga didto miduol ug mangayo kang Guardo, pinaagi sa pagtangtang sa basketball boards nga ila nang napahimuslan.
Karon nga nagbitay na ang mga basketball goals ni Tomas, pangutan-a kuno ninyo ang mga tawo og nalipay ba. Pangutan-a usab kun mobotar ba ni Tomas karong Mayo 10.