Ang mga pordoy’ng mga sakop sa urban poor groups mao gyud kanunay ang gamiton sa pamolitika sa mga karahong politiko.
Mao kini ang nahitabo karon sa dakbayan sa Mandaue, ang pagpili og benepisyaryong urban poor alang sa 9.2 hektaryang luna nga gi-award sa korte ngadto kanila nga sakop sa Federation of Mandaue Community Urban Poor (FEDMACUPI).
Ang proseso sa pagpili og benepisyaryo wala sunda ni Mayor Jonas Cortes. Inay ang Department of Social Welfare and Development (DSWD), ang barangay, Philippine Commission for the Urban Poor, FEDMCUPI ug ang Housing Urban Development Office (HUDO) mao ang manglista ug mo-screen sa mga benepisyaryo.
Apan ngano man gyud ang City Hall sa Mandaue man ang nagpa-alig-alig og pili og mga benepisyaryo? Kay adunay nagsingabot nga eleksiyon? Kay ang mga naaprobahan sa Mandaue City Hall mobotar ni Jonas sa eleksiyon kay naka-utang na sila og kabubut-on?
Kamong mga napiling benepisyaryo karon nga naapil sa lista sa Mandaue City hall , ayaw ninyo og sabta nga nakautang na kamo og kabubut-on ni Mayor Jonas Cortes. Kamo ra gyud ang gikabuangan aron gamiton kamo sa kampanya ni Jonas. Timan-i ninyo kuwestiyonable kanang inyong pagka-benepisyaryo. Kun adunay mopasaka og reklamo ngadto sa hingtungdang ahensiya, mahimo pa nga ikanselar ang inyong mga ngalan kun mapamatud-an nga wala isubay sa prosesyo ang pagpili ninyo.
Ang maayo niana, dangop kamo sa angay ninyong dangpan aron makorehian kanang proseso ug makarga ang inyong ngalan. Kay nagduda ko, kutob ra kana sa Mayo 2010 kanang inyong pagka-benepisyaryo ug kun makanselar tungod sa kabuang sa pamunoan ni Jonas, kamoy makaluluoy.
* * *
Bisan computer na ang gamiton sa mga presinto karong Mayo 10 nga eleksiyon, daghan gihapon ang kabalaka sa mga botante nga basin og totyo-on gihapon ang presidential election sama sa nangaging eleksiyon nga nakapadaog kang Pres. Gloria Arroyo.
Unang kabalaka sa mga botante mao ang moderno nga pagpanikas, kay lagi computerized na, ang tikas ipaagi na usab og computer pinaagi sa pag-hack sa sistema sa Smartmatic ug TIM nga maoy gikontrata sa gobyerno nga maoy mopatuman sa computerized election ning tuig 2010.
Apan niadtong Huwebes ko lang nahibaw-an atol sa among quarterly meeting sa Cebu Citizens-Press Council sa Fernan Press Center sa Ecotech, nga ang naandang pagpanikas dili gihapon malikayan.
Mismo ang representante sa Smartmatic-TIM ug si Comelec provincial supervisor Lionel Marco Castillano mikonpirmar nga ang balota nga isulod sa PCOS machine sa matag presinto dili luwas sa tikas. Unsaon man? Ang naandan nga paagi mao ang pagsulat sa balota sa mga ngalan sa mga kandidato nga iboto. Karon, ang balota aduna nay lingin tupad sa ngalan sa kandidato. Kun botohan nimo si Juan dela Cruz, ang lingin sa tupad sa iyang ngalan maoy botohan. Sa ato pa, ang paagi kaniadto sa pagpanikas nga mao ang pagsulat og ngalan sa mga balota pinaagi sa usa lamang ka tawo mas lisud kay sa paagi karon nianang bag-ong balota. Kay kun kaniadto ngalan sa kandidato ang isulat, karon “shading” na lang.
Kun adunay “election protest” sa miaging sistema nga dili computerized, kay adunay tikas nga nahitabo (kay lagi gisulat ang mga ngalan sa kandidato pinaagi sa usa ka kamot lamang), mas sayon ilhon kun sinulat ba gyud sa usa ka kamot lamang ang mga ngalan sa balota pinaagi sa handwriting ug signature expert.
Apan karon, ang handwriting ug signature expert dili makadeterminar kun gi-shade ba sa usa lamang ka kamot ang shading sa balota. Mao kini ang bantayanan sa Mindanao . Amahan mismo sa usa ka sundalo nga usa usab ka sundalo ang mikonpirmar kanako nga ang mga sundalo sa Mindanao maoy gipasulat sa mga balota pabor kang Pres. Arroyo.
Mas sayon karon ilang buhaton, ang kandidato mopalit lang og balota gikan sa nag-negosyo niini, ipa-shade sa pipila ka kamot pabor sa kandidato, daog na.
Si Sen. Mar Roxas nga kandidato pagka-bise presidente ubos sa Liberal party nahadlok usab nga gamiton sa Malacañang brownout aron makapanikas.
Dili pa gyud kini mao. Adunay P2 bilyones nga calamity fund si Pres. Arroyo nga mahimo niyang i-augment ngadto sa mga lokal nga kagamhanan sa Mindanao alang kunohay sa pagpamalit og mga generator sets aron likayan ang brownout.
Apan sama kang Roxas, nahadlok usab ako nga kining P2 bilyones gamiton hinuon aron ilawog sa mga lokal nga mga kandidato aron maoy momaniobra sa eleksiyon sa Mindanao ug padag-on ang iyang kandidato. Kinsa man ang iyang kandidato? Matud pa sa kampo sa presidentiable nga si Noynoy Aquino, padayon gi-monitor sa ilang partido ang “Villaroyo” (Villar ug Arroyo coalition). Motuo ba kamo nga pinaagi sa salapi ni Villar ug sa P2 bilyones sa Malacañang mosaler ang pagpanikas aron padag-on si Villar? Nganong dili man si Gibo Teodoro? Kay wala mosaka sa survey? Posible kaayo ang pagtuo ni Roxas. Gihimo niyang sanglitanan ang 2004 nga presidential election nga walay kaulaw nga gigamit ni Arroyo ang P728 milyones nga fertilizer fund alang sa campaign fund niini nga maoy nakapadaog niya didto sa Mindanao .
* * *
Adunay dili maayong motibo ang nagpasaka og kaso ngadto sa Ombudsman-Visayas batok sa hepe sa Customs Intelligence and Investigation Service (CIIS-Cebu) nga si Koko Holganza.
Usa ka nagpailang Hans Ernest Aparice III nga nangangkong negosyante isip trucker ug importer sa Subangdaku, dakbayan sa Mandaue mireklamo kang Koko tungod sa matud niya “overstaying” sa maong opisyal isip hepe sa CIIS-Cebu, gawas sa iyang pagka-“non-organic” nga kawani sa CIIS sa Bureau of Customs. Giladlad usab sa reklamante ang giingong mga kabtangan ni Koko nga matud pa dili makab-ot sa usa ka opisyal sama niya nga nagsuweldo lamang og P14 mil ang bulan isip Legal Officer II sa BOC. Gibutyag sa sulat-reklamo ni Aparice nga gi-address ni Deputy Ombudsman for the Visayas Pelagio Apostol nga si Koko adunay balay sa Sto. Niño Village sa barangay Banilad ug building sa dalan Macopa sa Mambaling. Aduna usab kini bulangan nga ginama sa bildo nga gi-aircon didto sa isla sa Bantayan ug adunay halapad nga “agricultural land.” Apan si Koko kinsa nakaserbisyo isip konsehal sa dakbayan sa Sugbo, mihimakak nga iya ang balay sa gihisgutang village, samtang ang building sa Macopa natukod sa wala pa siya masulod sa customs, ug ang halapad nga yuta sa Bantayan iya sa iyang inahan nga gi-develop sa iyang pamilya.
Nagtuo hinuon si Koko nga “fictitious” ang ngalan nga Aparice tungod kay wala kini sa listahan sa mga trucker ug importer nga nagnegosyo sa adwana sa Sugbo. Kun tinuod nga “fictitious” kini si Aparice, angayan ba nga i-entertain sa Ombudsman ang iyang reklamo?
Unsa kahay motibo niining tawhana sa pagpasaka niya og reklamo batok ni Koko?