Ang mga gitawag nga “do-gooders” nga gustong mohatag og tabang pinansyal ngadto sa mga naigo sa dagkong kalamidad apan wala'y sapi nga ikatunol, nag-fund raising na lang. Ug ang uban mirisgo sa ilang kinabuhi.
* * *
Nagkalidades ra ang matang sa ilang pag-fund raising aron lang makadani og kontribusyon gikan sa mga tawo kang kansang kasingkasing ilang matandog.
* * *
Diha toy 65 anyos nga mangingisda nga milangoy og 48 oras aron makatigom og kuwarta alang sa mga nabiktima sa tsunami didto sa Thailand. Nikita kini og US$35,000.
* * *
Usa ka lalaki nga buta misaka-kanaug l00 ka higayon sa usa ka bilding sa New York nga dunay 25 ka andana. Kini alang sa mga buta usab didto sa Naimbia. Nakakolekta siya og US$32,000.
* * *
Adtong miaging adlaw, dihay balita nga dunay usa ka madre didto sa Texas nga molukso sa ayroplano (usa ka skydiving stunt) alang sa mga nabiktima sa linog didto sa Haiti. Iyang target: US$25,000.
* * *
Nindot gihapon kining kalibutan nga atong gipuy-an kun atong hunahunaon nga naay daghang mga tawo nga morisgo sa ilang panglawas ug kinabuhi aron lang makatabang sa mga nanginahanglan og tabang.
* * *
TRIVIA — Gud morning sa mga higala ta diha sa Isla sa Camotes ... Salamat ni Tatoy Llenares kinsa mipahibawo kanato nga usa siya ka “original reader” sa Banat News... Pikpik sa abaga ngadto sa atong mga kugihan nga newsboys diha sa South ug North Bus Terminals.