KAMI ng aking panganay na anak na si Senate President Pro Tempore Jinggoy Ejercito Estrada, chairman ng Senate Committee on Labor, Employment and Human Resources Development at ng joint Congressional Oversight Committee on Labor and Employment, ay natutuwa sa paglaya ng isang OFW na nakulong kamaka-ilan sa Kuwait dahil sa maling bintang.
Itago natin siya sa pangalang Dr. Rea, isang dentista na inaresto at ikinulong sa naturang bansa noong Agosto 19, 2009 dahil sa bintang na ang ginawa niya raw pagbunot sa ngipin ng isang kapwa Pilipino roon ay nagresulta sa pagkamatay nito.
Ang mga Pilipino dental professional at iba pang Pinoy sa Kuwait na naniniwalang mali ang bintang kay Dr. Rea ay nagtulong-tulong upang makakuha ng abogado na magtatanggol sa kanya.
Mabuti naman at isang mabait at mahusay na human rights lawyer sa katauhan ni Sheikha Fawsia Al Sabah ang nagbigay ng serbisyo kay Dr. Rea, laluna’t ang naturang abogado ay nakakilala at naging kaibigan namin ni Jinggoy at ni Presidente Erap noong bumisita kami sa Independence Day celebration ng Pilipino community sa Kuwait noong Hunyo 2009.
Makalipas ang apat na buwan at apat na hearing ng kaso, noong Disyembre 22 ay ibinasura ng korte ang kaso matapos napatunayang mali ang bintang kay Dr. Rea dahil lumabas sa medico-legal report na ang sanhi ng kamatayan ng pasyente ay atake sa puso at hindi ito dahil sa pagbunot ng ngipin.
Malaya na muling nakapaglilibot sa Kuwait ngayon si Dr. Rea at kasalukuyan niyang inaasikaso ang mga papeles upang makauwi sa Pilipinas at makapiling ang kanyang pamilya rito.
Samantala ay inaalam ni Jinggoy ang ilang lumutang na impormasyon na tila nagkaroon daw ng pagkukulang sa pag-aasikaso kay Dr. Rea ang ating embahada sa Kuwait.
Si Jinggoy ay laging nangunguna sa pagpuri sa mga opisyal at kawani ng Philippine embassy o sinumang kinatawan ng pamahalaan ng Pilipinas na nagbibigay ng magandang serbisyo, pero agad niyang sinusuri at inaaksyunan kung may reklamo sa anumang pagpapabaya ng mga ito sa kanilang tungkulin.