Di gyud hitupngan ang abilidad sa mga Pinoy, lihiro kaayo ta nga mangita og paagi aron makahimo og substitute sa usa ka butang nga gidili. Usa sa mga pananglitan niini mao ang nikatap nga mga lantaka isip hulip sa mahal ug delikado nga mga firecrackers.
Tungod sa way pu-as nga kampanya sa gobyerno batok sa paggamit og mga firecrackers atol sa pagsugat sa Pasko ug Bag-ong Tuig ug tungod sa kamahal sa mga firecrackers nakakita og laing paagi ang mga Pinoy aron sipa ug duna gihapoy mga boto nga madunggan atol sa maong mga kasaulogan bisan og dili mogamit og mga firecrackers.
Dinhi naimbento ang lantaka, usa ka moderno nga klase sa kanyon nga kawayan, diin mga basiyo nga lata, botelya sa mineral water ug PVC pipe maoy gigamit. Minus og gasto kay sa mopalit og firecracker ug mas luwas pa nga gamiton.
Layo sa piligro nga mabuthan ang imong mga kamot ug mapungkol. Sa 20 pisos nga botelya sa “flying tiger” nga alcohol mapul-an ka na sa pagpabuto. Dili ba dako kaayo ang imong madaginot niini kon itandi sa P1.50 ngadto sa P3 matag-usa nga paboto depende sa klase.
Apan tungod sa mando sa kapolisan nga imbargohon ang mga lantaka magmingaw ang mga kabus nga dili makapalit og rebentador pagsugat sa Bag-ong Tuig. Gigamit nga rason sa kapolisan ang nahitabo didto sa Talisay diin usa ka 6-anyos nga batang lalaki ang namatay tungod sa lantaka ug ang giingong mga reklamo sa mga nakuyawan sa boto sa lantaka.
Ang hepe sa kapolisan dinhi sa dakbayan sa Sugbo admitido nga dili illegal ang lantaka ug wala say bala-od nga nagdili niini. Kon mao unsa may basihanan sa kapolisan pagpangimbargo sa mga lantaka?
Gawas kon ang usa ka tawo nga naghupot og lantaka gireklamo kay nakahimo og kasamok o ba kaha nakadisturbo og laing tawo dili mamahimong basta nalang kuhaon sa kapolisan ang mga lantaka nga ilang makit-an diha sa kadalanan.
Illegal ang paghimo niini og mamahimo silang ireklamo sa pagpangawat o ba kaha robbery kon ilang pugson pagkuha ang lantaka kon dili ihatag sa tag-iya. Kon ako’y tag-iya sa lantaka dili nako ihatag gawas kon makapakita og balaud ang kapolisan nga nagdili sa paggamit niini.
Nganong robbery? Tungod kay maisip nga personal property sa usa ka tawo ang ilang gikuha nga kontra sa kabubut-on sa tag-iya.
Wala ko kakita sa rason nganong imbargohon ang mga lantaka nga mao ray ma-afford sa mga kabus. Kon duna may angayang i-ban dili ang lantaka kon dili ang mga rebentador tungod kay gawas nga dilikado, magmugna pa gyud ni og grabe nga basura ug aso nga makadaut sa kalikupan.
Nganong ato mang hikawan ang mga kabus sa ilang kalipay nga wa may illegal sa ilang gihimo. Kon duna may mga aksidente nga nahitabo sa paggamit og lantaka wa ra ni sa kumingking sa mga aksidente sa rebentador.
Nganong wa man hingpit i-dili ang paggamit sa rebentador dinhi sa Sugbo tungod ba kay mga adunahan ang sagad mogamit niini? Unya ang mga kabus nga lantaka ray ma-afford maoy atong hikawan?
Dili ba mogawas nga anti-poor ang atong kapolisan niini?
* * *