Lain-lain ang mga mitumaw nga mga reaksyon sa gipakanaug nga Martial Law sa Maguindanao, ug hangtod karon padayong gilalisan ang legalidad sa maong lakang sa Malacañang.
Aron adunay legal nga basehan sa pag imponer sa Martial Law, gikinahanglan nga adunay rebelyon sa lugar nga diin kini i-imponer. Ug ang baroganan sa Malacañang mao nga adunay mga lakang pagrebelde nga gihimo o giplanohang himoon sa mga lumalaban sa pamilyang Ampatuan tungod sa pagdakop kanila sa salang pag-masaker sa mga pamilya ug lumalaban sa mga kontra niini sa politika nga mga Mangudadatu, lakip pa ang mga reporter ug mga walay labot.
Sulod sa pipila ka tuig, adunay kagubot ang Mindanao . Tungod sa kadugay nga paglungtad sa maong kagubot, nahimo nang kultura ug pipila sa mga tawo didto hapit wala na makatagamtam kon unsa ang kalinaw. Maingon nato nga kining maong kagubot rebelyon usab kay politikal man ang giingong hinungdan niini. Apan kining estado sa kagubot didto nga maingon-ingon sab nato nga rebelyon sa Mindanao sa sulod sa dugay nga panahon dili man lang didto nahitabo sa Maguindanao kondili sa ubay-ubay nga lugar sa Mindanao.
Kon legal man ang Martial Law sa Maguindanao o dili, mahibaw-an kini sa pipila ka adlaw nga moabot kon mopagawas na ang Korte Suprema. Apan adunay laing anggulo nga atong sutaon, ug kini kon unsay nahimo nga ikaayo o ikadaot sa pagdeklarar sa Martial Law sa maong lugar.
Adunay mga nagpadayag og pagsuporta sa Martial Law tungod kay sa mao lamang paagi malimpyo ang maong lugar nga naghitak sa armas nga wala makontrolar sa gobiyerno kaniadto. Kon dinhi sa atoa daghan ang mahadlok nga magtinir og armas nga walay lisensya, didto sa Maguindanao dili lamang pipila o ordinaryo ang mga armas nga gipanghuptan sa mga tawo didto. Kay kon dili gud kuno i-imponer ang Martial Law, taas pa nga proseso ang subayon ug dili kini paigo aron gyud paglimpyo sa Maguindanao sa mga ilegal nga armas, gani posible pa nga delikado ang mahimong mahitabo.
Daghan usab ang misupak kay aduna kunoy paglapas sa tawhanong katungod, aduna say nahadlok nga abusahan ang Martial Law sama sa nahitabo sa panahon ni Marcos.
Dako ang kauwawan nga naangkon sa Pilipinas tungod sa nahitabong masaker. Dako ang kadaot nga nahimo niining mga bandido sa Mindanao sa atong nasud. Ang atong kagamhanan midesidir nga ang pagpaubos sa Martial Law maoy dinalian ug epektibong solusyon aron paglimpyo sa mga abuso sa Mindanao nga sulod sa pipila ka dekada walay presidente nga makaako pagsumpo. Matod pa sa akong kaila nga taga Mindanao , siya uyon nga gihimo kini, apan nanghinaut usab siya nga dili kini magdugay.
Alang sa inyong mga panahom, palihug email sa hinuktoki@gmail.com. Daghang salamat.