Grabeha g’yod diay ka gamhanan sa mga Ampatuan didto sa Maguindanao no? Tiaw mo, pwerteng daghana nga mga armas alang sa gubat ang nasakmit dihang gironda ang duol sa balay sa mayor nga si Andal Ampatuan.
Nakapanglingo-lingo ko nga naminaw sa report nga duna kuno’y mga machine gun, basoka, ug daghan pang mga armas ug mga kinahon nga bala sa lainlaing kalibre.
Bisan ug wala kadto makuha sa compound sa balay ni Mayor Andal apan daku g’yod ang pagtoo sa mga tinugyanan sa balaud nga kadto iya sa mga Ampatuan.
Kun dunay gubat unya kadtong maong mga armas maoy gamiton, pwerteng ngilngiga na nga away. Kinsa man god ang yano-yano nga makahupot sa maong mga matang sa armas. Nganong karon ra man kana nasakmit?
Ayaw ko og ingna nga wala masayod niini ang mga militar, mga polis kaniadto. Sigurado ko nga karon lang sila makabaton og kaisog pagronda sa maong mga armas human sa masaker sa 57 ka tawo, apil na ang mga sakop sa media.
Sa akong lindog pipila ka adlaw ang nakalabay, akong gisaway ang kapakyas sa kapolisan ug militar sa pagpatuman og hugot nga kampanya batok sa mga tawo nga naghupot og dili lisensyadong armas didto sa Mindanao.
Dinhi sa Sugbo, estrikto kaayo kay bisan og duna kay armas nga tayaon nga gitipigan sa balay dakpon ka man g’yod kun mahibaw-an ka sa mga polis.
Angay’ng paspasan sa Department of Justice (DOJ) ang pag-imbestigar sa giingong kalambigitan ni Mayor Andal sa nahitabo nga pagbanhig ug pagpatay sa mga biktima.
Kun mahimo kini sa administrasyon ni Presidente Arroyo sa dili pa ang eleksyon, makapalambo pagbalik sa nagkatidlum nga imahe sa presidente.
* * *
Usa sa mga kandidato pagka konsehal sa south district dinhi sa dakbayan sa Sugbo nagtinguha karon nga matangtang sa pagka kandidato sila si Ginang Margot Osmeña ug Ronald Cuenco.
Ang rason ni Rajeni V. Dy sa pagpasaka og pag-awhag sa Commission on Elections nga tangtangon ang ngalan nila ni Margot ug Ronald mao nga kuno ang duha mga “green card holders.”
Nagpasabot kuno nga sila mga American citizens ug walay katungod nga mohupot og mga elective positions dinhi sa nasud. Apan ang ilang petisyon wala dawata sa Comelec dinhi sa Sugbo.
Ang balaud god sa Comelec mao nga adto g’yod sa Manila ipasaka ang mga petition sa pagpakanselar sa mga certificates of candidacy sa mga kandidato. Buyno, husto usab si Rajeni kay kun tinuod nga mga green card holders sila si Margot ug Ronald, dili sila katugotan nga makadagan. Apan nahibaw-an nako nga usa ka tuig na kapin nga gisalikway na ni Margot ang iyang pagka American citizenship.
Mao kini ang rason nga may kaisog si Margot nga miingon “Let them file,” dihang akong gipahibalo nga mohimo’g lakang si Rajeni kanila. Gihulagway ni Mayor Tomas Osmeña, bana ni Margot, nga “desperate move” ni Rajeni ug sa mga tawo nga nagpaluyo kaniya ang maong lakang, apan wala sila mahadlok.
Sama ra god nga kun si Winston Garcia, kang kansang balay sakop kaniadto sa Cabancalan, Mandaue (boundary sa Cebu City ug Mandaue) unya mibalhin pagparehistro dinhi sa dakbayan, dili kini kwestyonon ni Osmeña kun si Winston modayon paglansar pagka mayor.
Alang nako, malipay ko nga si Winston modagan pagka mayor aron dunay lig-on nga kandidato nga ikatigi si Vice Mayor Mike Rama. Karon god, bisan og 13 ka tawo ang nagpapili pagka mayor, apan silang tanan walay dag-anan ni Mike.