Dul-an sa duha ka tuig nga gisuhid sa fact-finding team ang mga dokumento may kalambigitan sa mga kontrata pagtukod sa Cebu International Convention Center.
Gitun-an ug gianalisar pag-ayo sa team nga gilangkuban nila ni Engr. Roderick Blazo, Elmer Gutierez ug Joy Dacumos ang kapin sa lima ka tiil nga gibag-on sa mga dokumento aron makakab-ot og komprihensibo nga report.
Ang ilang report gisubli pagtuon ug pagtan-aw ni Dir. Carla Tanco sa wala pa ni moadto ni Assistant Ombudsman Virginia Palanca Santiago alang sa final review ug approval.
Kini maoy proseso nga giagian sa Final Evaluation Report sa team nga mipahigayon og fact-finding investigation maylabot sa pasangil sa mga anomaliya pagtukod sa CICC. Apan ang dul-an sa duha ka tuig nga kahago sa mga imbistigador mahulog nga way kapuslanan tungod kay gibaliwa man ni Deputy Ombudsman Pelagio Apostol ang ilang findings.
Si Apostol miangkong mihimo siya og iyang kaugalingong resolution kalabot niini ug iyang itugyan ngadto ni Ombudsman Merceditas Gutierez ang paghukom hain sa duha ka mga resolution ang iyang aprobahan.
Taliwala niini nisibaw ang report nga buot ni Apostol nga iabswelto sa panel si Gobernador Gwendolyn Garcia gikan sa bisan unsang tulobagon sa mga sipyat pagtukod sa CICC.
Tungod kay ang panel hugtanon mang mibarog sa ilang findings si Apostol mihimo og iyang kaugalingon nga resolution.
Ambot pilay iyang gidawat aron mamahimong abogado ni Garcia tungod kay supak sa ilang kaugalingong lagda ang gihimo ni Apostol. Sa unang bahin, ang Ombudsman Visayas lang ang dunay jurisdiction sa pag-upgrade sa fact-finding investigation.
Ikaduha, dili sab unta angayang manghilabot si Apostol sa fact-finding tungod kay basi sa ilang kaugalingong lagda si Santiago ra maoy angayang moaprobar niini.
Ngano? Kini tungod kay kun moapil si Apostol sa fact-finding unya ang resulta mao ang pag-upgrade sa kaso siya maoy moaprobar sa resulta sa preliminary investigation. Sa ato pa kun manghilabot siya sa fact-finding unya siya ra pod ang mo-aprove sa result sa preliminary investigation mahulog nga siya maoy kihante unya siya ra poy huwis.
Pero nganong nanghilabot man gyud si Apostol sa fact-finding result sa CICC? Ambot si Apostol ray makatubag niini.
Posibli nga iyang gituyo aron naa siya’y rason pagduso sa kaso didto sa kaulohan aron mas sayon rang luokon ang hustisya. Kun ipadala niya sa Manila ang iyang kaugalingon nga resolution ug ang gihimo sa panel aron si Gutierez maoy mohukom, unsa may kasigurohan sa mga Sugboanon nga dili mopatigbabaw ang utang kabubut-on ni Gutierez?
Hikalimtan kaha ni Gutierez nga ang usa sa dako og gikatabang niya aron malutsan ang impeachment complaint nga iyang giatubang didto sa kongreso mao ang manghod sa gobernador nga si Kongresista Pablo John Garcia?
Kun dinhi palang daan sa Ombudsman Visayas daw sa gitayopi na ang imbistigasyon unsa pa kaha didto sa kaulohan? Kanunay’ng gipanghambog ni Apostol ang iyang record nga kuno daghan siya’g mga heneral nga gipapreso lakip na gani si kanhi presidente Joseph Estrada.
Mao nga karon akong gihagit si Apostol nga barugan ang iyang gipanghambog ug pasagdan nga ang hustisya ug kamatuoran mopatigbabaw niining imbistigasyon sa CICC.
Ayaw ipaagi og limong-limong ang publiko aron malikayan ang pagduda nga lakip ka nahalin na.
* * *