Ang mga sakop sa media nga mitambong sa “get together” ni Senador Manny Villar kagahapon, nakadayeg g’yod sa kalantip sa iyang panabot dihang nanubag siya sa pangutana sa mga sakop sa media.
Dunay sakop sa media nga akong nadunggan nga mihulagway ni Villar nga tukma g’yod nga himoong presidente sa nasud.
Husto ang baruganan sa ubang sakop sa media nga dili kay ang kainila sa usa ka kandidato maoy himoong basihanan nga kini na maoy angay’ng pilion pagka presidente.
Nakagusto ko sa programa ni Villar nga kun siya maoy modaug pagka presidente human sa eleksyon karong sunod tuig, ang pagpalambo sa revenue collection maoy iyang unahon.
Apan gipasabot ni Villar nga bisan og gusto niya nga molambo ang revenue collection, apan wala kini magpasabot nga pausbawan ang bayranan sa buhis.
Kini maoy dugay na nakong gibalik-balik sa akong mga lindog nga daghan kaayo nga kapangwartahan ang kagamhanan nga kun giayo pa nila pagkolekta, dili kita maglisod sa panggasto sa mga proyekto.
Apan unsay gihimo sa atong kagamhanan, sige nga pausbaw sa buhis, ilabi na ang pagpatuman og 12 porsiento nga expanded value added tax.
Dinhing bahina, nagkatukma ang among baruganan ni Senador Villar nga dili na kinahanglan nga mopatuman pa kita og “additional taxes” kun dili paspasan lang nato ang pagkolekta sa mga buhis.
Kun dugangan god nato ang bayranan sa buhis, ang maalaut mao ra kadtong mga tawo nga buotan mobayad, apan magkatawa kadtong mga “tax evaders.”
* * *
Belated birthday greetings diay ngadto sa akong amigo si “Koronel” Ramon Gallardo, sakop sa public information office sa Cebu Provincial government.
Gisaulog niya ang sumad sa iyang adlaw’ng natawhan kagahapon, apan ang makabuhong nga salo-salo gipahigayon niya kaniadtong Biyernes sa gabii.
Akong lauman nga si Koronel Gallardo hatagan pa sa Ginoo og daghang katuigan ug makaabot pa siya og 100 years.
* * *
Pwerteng daghana pa bitaw sa mga sakyanan nga nagdagan-dagan karon nga pwerteng ituma sa aso nga gibuga gikan sa iyang makina.
Kay ang buwan sa Nobyembre gideklarar man nga “Clean Air Month” buot ni Konsehal Arsenio Pacana nga ang Land Transportation Office ug ang City Traffic Operations Management mopaspas sa paghimo’g operation batok sa mga sakyanan nga nagbuga og itom nga aso.
Grabeha bitaw ning ubang mga sakyanan uy. Ang akong sakyanan “diesel” man sab apan dili man mobuga og itom nga aso sama anang uban nga mga passenger jeepney ug mga cargo truck.
* * *
Nganong daghan mang mga sakyanan nga nagdagan-dagan nga depektoso ang mga suga bisan og kini bag-o pa nga gipa-renew ang rehistro?
Unsa, sigi lang mo og dawat og suborno diha sa LTO? Kalaw-ay god ani nga gi-renew man ninyo ang rehistro sa maong mga sakyanan bisan og depektoso ang mga suga.
Dili g’yod ninyo mabasol ang katawhan nga magduda nga nakadawat mo’g mga suborno diha sa LTO kay wala man ninyo tumana ang angay’ng buhaton.