Malinawon ang kasaulogan sa kalagkalag sud sa mga sam-ang dinhi sa dakbayan sa Sugbu karong tuiga.
Obserbasyon kini sa kadagkuan sa kapolisan. Ug miuyon ang duha ka tigduma sa duha ka memorial parks.
Sa katapusan nadisiplina na gyud kuno ang katawhan. Nakakat-on sa pagtuman sa mga lagda nga gipasunod sud sa mga sementeryo.
Wala na ang kalangas gikan sa mga videoke nga gipasud sa pipila ka mga misaulog sa okasyon.
Wala na ang huboghubog nga kaniadto nasaksihan nato bisan pa nga diha nay kamandoan nga dili moda’g ilimnon nga makahubog sud sa sam-ang.
Angay nato nga ikalipay kini kay sa katapusan ato nang nasaulog ang duha ka adlaw sa kalagkalag sa dakong kaugdang ug kamalinawon.
Angay usab nato nga pahalipayan ang mga gitahasan sa pagkab-ut sa kalinaw.