Ang pagbiya ni Senador Chiz Escudero sa iyang partido nga Nationalist Peoples Coalition usa lamang ka drama nga gituyo sa paghimo sa iyang kampo aron tabunan ang tinooray nga tumong nga mao ang pagsibog sa iyang tinguha sa pagpapili sa pagka pangulo sa nasud sa Pilipinas.
Sa iyang pagpahibalo sa pagbiya sa partido nga maoy iyang gisakyan sa pagka kongresista ug pagka senador wa niya i-apil sa pagpahibalo kun modayon ba gayod siya sa pagpapili sa pagka pangulo sa nasud, hinoon iyang gihatagan og makalibog nga pahayag ang iyang mga dumadapig mahitungod sa iyang laraw ning umaabot nga bugnong lugaynon.
Sayod ang Senador unsa ka mahinungdanon ang partido ngadto kaniya kun buot man gayod niya nga magpapili sa pagka pangulo. Sayod usab siya unsa ka lisod ang pagpapili nga walay partido. Ang Nationalist Peoples Coalition mao ang ikaduha sa dagkong partido sa nasud. Busa dako kaayo kini og ikatabang sa iyang kandidatora kun hisgotan ang kuwarta ug organisasyon. Apan ina kay palig-onon ang iyang pagkupot sa partido nga mituboy kaniya sa pagka pangulo iyaha hinoon kining gibiyaan. Maong ako nagtoo nga wa nay laraw ang Senador nga magpapili sa pagka pangulo. Usa ka political suicide ang himoon ni Senador Chiz Escudero kun iyang idayon ang pagpapili sa labing taas nga position sa nasud nga walay partido.
Lisod toohan ang giingon sa Senador nga dili siya gustong diktaran og partido o kinsa man nga tawo kun buot man ugaling siyang magpapili sa pagka pangulo kana gumikan kay way laing makadiktar kaniya kun dili ang katawhan lamang. Mao ba? Wa kaha magsalimoang ang Senador? Unsa man kahay iyang mahimo sa Malakanyang kun managlahi ang kagustohan sa katawhan nga iyang gipabuot unsay iyang buhaton kun mahimo na siyang pangulo? Di kaha hinoon ta magkaguliyang?
Seguro nabasa ni Chiz ang body language sa iyang amo nga si Danding Cojuangco nga sa hilom adto kini mosuporta sa paboritong pag-umangkon nga magpapili usab sa pagka pangulo ubos sa partido sa administration. Napanglantawan seguro ni Chiz nga sa ultimaora biyaan siya sa iyang partido busa mas maayong mouna sa pagbiya kauban ang iyang politikanhong ambisyon kay sa siya ang biyaan niini.