Pag-anhi sa Sugbo kagahapon ni Senador Mar Roxas, daghan ko og mga kumentaryo nga nadunggan gikan sa mga tawo nga miapil pagdugok kaniya.
Ilang gidayeg si Roxas tungod sa iyang baruganan nga gihulagway nila nga ang senador dili g’yod hakog sa gahum. Ang gipasabot nila mao ang pagsibog ni Roxas pagpapili pagka presidente ubos sa partido Liberal para kang Senador Noynoy Aquino.
Wala malilong kanato nga si Roxas dugay na nga nangandoy nga mag-presidente sa nasud, apan alang sa kahiusahan sa ilang partido, wala magduha-duha si Roxas pagsibog bisan og daku na kaayo siya og nagasto.
Akong natan-aw nga dalaygon kaayo ang gihimo ni Mar nga pagsibog sa iyang tinguha nga mag-presidente. Kun wala pa siya mosibog, mahimong si Noynoy magduha-duha usab pagdeklarar nga siya ang molansar pagka presidente sa ilang partido.
Matud ni Mar nga ang nakatukmod g’yod kaniya nga mohimo sa maong hukom mao ang kanunay’ng gipasabot kaniadto sa iyang apohan nga si kanhi Presidente Manuel Roxas nga “Country Above Self.”
* * *
Gihulagway si Mar sa iyang mga supporters nga usa ka tinuod nga “stateman” tungod kay gihiklin ug wala niya ipatigbabaw ang iyang personal interest aron matuman ang dugay na niyang gipangandoy.
Ang survey nga gihimo sa Social Weather Station nagpakita nga nag-una si Mar sa mga nagtinguha nga mag-bise presidente ug nagsunod kaniya si Senador Loren Legarda.
Ang kumentaryo nga akong nadunggan mao nga sagad g’yod sa mga politiko daghan kaayo og mga pasalig atul sa kampanya. Ila kunong usbon ang sistema sa atong kagamhanan aron molambo ang atong kahimtang, sumpoon ang pagpangawkaw ug daghan pa nga pasalig, apan wala gihapo’y nahimo.
Nahinumdom ko sa giingon ni Mayor Tomas Osmeña -- ang No.1 supporter ni Mar dinhi sa dakbayan, -- nga ang responsable pagpasulod sa mga “Call Centers” dinhi sa nasud mao si Mar dihang siya pa maoy Secretary sa Department of Trade and Industry.
Karon ang ilang programa ni Noynoy ug Mar mao ang pagpahigayon og paspas nga Jobs Fair nga gibunyagan nila og “Trabaho Para Kanimo.”
Nindot kini nga programa kay matabangan kadtong mga tawo, mga bag-ong graduates, nga nag-antos sa kalisud kay wala pa makakita og trabaho.
* * *
Daghan karon sa mga politiko nga mipadayag na og tinguha nga mag-presidente, mga milyonaryo. Usahay moabot sa atong huna-huna nga tingali dili g’yod sila mohimo og binuang sama sa pangurakut sa kwarta sa kagamhanan kay datu na man sila.
Apan ang usa god sa makadaut mao man ang mga tawo nga maglibot sa presidente. Dili ang katawhan maoy mopili kanila, kun dili ang presidente ra maoy magbuot.
Mao man bitaw kana ang rason nga daghan kaayo ang mag “ikog-ikog” sa mga tawo nga mokandidato pagka presidente. Mao kini ang inyong timbang-timbangon kun hain ang maayong pillion.
Kun ako ang pagbut-on, mas maayo nga pilion kadtong mga tawo nga makamao nga mosilot sa mga makahimo og salaud, bisan og ila pa nga mga supporter sa politika.
* * *
Mahal ra g’yod tinuod ang P11,000 nga basketball board nga gipalit sa DPWH Cebu City district engineering office gikan sa Josan Construction Supplies & Services sa Consolacion.
Ambot og unsa kaha pod nga matang sa pagka supplier kining Josan Construction nga kun tawgon nimo sa ilang numero 344-2635 wala g’yoy motubag.
Tagpila ba ang Marine plywood nga uno ang gibag-on? Ang usa ka plywood mahimong duha ka basketball board, unya gipintalan, gibutangan og ring, P11,000 na.