Ang dalan V. Gullas, luyo nga bahin sa Gaisano Main, usa ka gamay kaayong karsada. Gawas nga gamay kini nga karsada, misamot kagamay tungod kay gibutangan pa g’yod og “parking area for pay” sa daplin.
Tawgon lang nako ang atensyon sa kadagkoan sa Dasia Security Agency nga badlongon unta nila ang drayber sa ilang armored van nga abusado kaayo og daw siya na maoy hari sa karsada.
Alas dos sa hapon niadtong Oktobre 8, miabot ang armored vehicle sa Dasia Security Agency nga ang plate number MCY-200 nga ang body number 3186. Diha kini mihunong sa ubos sa back gate sa Gaisano Main.
Nasabtan nako nga nag-pick-up ang kawani sa bangko sa kwarta nga halin sa tindahan. Alang nako, walay problema bisan og ang gihunongan sa armored vehicle mao ang jeepney stop kay dili man sila magdugay.
Apan ang wala nako magustohi mao ang sagad g’yod buhaton sa drayber niini nga iatras niya ang sakyanan, pinaiwad ngadto sa elevated nga sidewalk. Sa paghimo niya niini, nagbabag na ang sakyanan sa karsada.
Ingon usab niini ang gihimo sa maong drayber kaniadto diri sa laing pultahan sa Gaisano habig sa D. Jakosalem. Gipaiwad gihapon niya og ako gani nga gibadlong.
Dili ko motoo nga ang drayber sa maong armored van wala na lang g’yoy utok nga dili makahuna-huna og unsay epekto sa iyang gihimo. Daghang mga sakyanan nga miagi sa maong dapit naglisud na sa paglusot.
Angay usab nga masayran sa kadagkoan sa Dasia Security Agency nga danghag kaayo ang inyong mga sakop nga gwardya nga miuban sa armored van sa maong higayon.
Aron g’yod tingali ingnon nga mora siya og artista sa sine, gikan nga migawas sa tindahan kay nag-abli na man ang pultahan sa van, milukso ra ni ngadto sa pultahan sa armored van.
Unsay nahitabo? Nalagpot ang iyang 38 kalibre nga revolver ug nahipunta sa kanal. Ang kauban na niyang gwardya nga maoy migunit sa luyo nga pultahan sa armored van maoy mipunit sa nahulog nga armas.
Kun nakahibalo ang maong gwardya nga wala niya i-clip ang holster sa armas kay aron tingali ready, nagbantay unta siya. Diha go’y tawo nga duol sa akong nahimutangan wala kapugong sa paglingo-lingo.
Ako lang giingnan nga ingon g’yod niana basta masubrahan na. Pag-usab na tawon mo uy. Alang sa drayber sa maong armored van, ayaw na tawon usba ang imong gihimo kay daghang mga tawo ang makasaway nimo.
* * *
Usa ka seminar-workshop ang gipahigayon kagahapon sa mga opisyal sa City Hall aron pagsuta kun unsay mga gikinahanglang buhaton aron ang dakbayan sa Sugbo mahimong friendly city ngadto sa tanan, ilabi na g’yod sa mga senior citizens kon mga edaran.
Gituki nila nga ang kakuwang og mga lingkoranan diha sa mga public places sa dakbayan usa kini sa rason nga pagka karon mora’g dili pa maisip nga ang Cebu City usa ka “age friendly city” ilabi na sa mga hamtong na ang pangedaron.
Tinuod, sama nako nga kapoyan na tawon kun molakaw og dugay, manginahanglan na nga molingkod matag karon ug unya. Kun dunay mga lingkoranan makalingkod na unta ang mga gikapoy.
Apan duna lang ko’y obserbasyon nga angay usab nga aksyonan sa mga barangay opisyal. Dunay pipila ka lingkoranan nga gitukod sa mga nagpakabana nato nga kaigsoonan, sama sa mga sakop sa rotarians, apan kini gigamit sa personal.
Kamong mga barangay opisyal angay’ng mosuta niini ug mobadlong sa mga tawo nga mapahimuslanon. Sama pananglit sa Waiting Shed, ayaw kamo pagtukod nga himoon kining tindahan.
Tan-awa diha sa eskena Archbishop Reyes Avenue ug Gorordo ingon man sa atbang, duha ka waiting sked gigamit ra nga butanganan og mga baligya. Maayo ba na? Unsay gihimo ni Kapitan Lorenzo Basamot?