Mora’g kulba-hinam g’yod diay ang eleksyon pagka kongresista sa north district dinhi sa dakbayan karong sunod tuig.
Kini tali sa pagkandidato ni Lahug barangay captain Mary Ann de los Santos ug Rachel “Cutie” del Mar nga anak ni Kongresista Raul del Mar.
Dili malalis nga ang akong higala nga si kongresista Del Mar hilabihan ka lig-on ug tingali walay makapilde diha sa iyang distrito, apan ambot ang anak og susama ba kaha sa amahan.
Usa sa mga sinaligan ni Mayor Tomas Osmeña, miangkon g’yod nga dili makapaneguro si Cutie nga modaug siya ni Mary Ann.
Ang record sa miaging eleksyon niadtong 2007 nagpakita nga si Mayor Osmeña milabaw lang og dili kaayo daghan nga botos sa north district kay ni Mary Ann.
Midaug si Tommy batok ni Mary Ann apan didto kini mikuha og makabungog nga botos sa kabarangayan sa south district, ilabi na sa iyang barangay, ang Guadalupe.
Anaa diha ang nakapakulbahinam. Matud pa ni Mary Ann nga anhi dinhi masuta kun ang mga botos nga para ni Kongresista Del Mar, “transferrable” ba ngadto sa iyang anak.
* * *
Akong klarohon, dili g’yod tinuod ang report nga dunay daghang reklamo nga nangilkil ang mga LTO deputized agents nga sakop sa Task Force Alpha.
Walay statistics sa LTO nga mapresentar nga ang mga sakop sa Task Force Alpha dunay daghang reklamo nga nangilkil.
Gisakitan ang mga sakop sa Task Force Alpha sa report nga gisuwat sa akong kaubang reporter, si Rey Pasaporte, nga ang TFA abusado ug kusog mangilkil.
Sagdi lang. Nasipyat lang tingali paghan-ay ni Rey ang iyang balita. Mahimong dunay daghang reklamo sa mga deputized agents nga nang-kwarta, apan dili tingali TFA.
Wala man god tingali masayod si Rey nga dili modawat ang TFA ug mga sakop nga walay trabaho o kaha walay negosyo.
Angkonon nako nga sakop ko sa maong grupo ug usa ko sa kusog kaayong manakop og mga masalaypong drayber, apan walay bisan usa ka drayber nga makatulisok nako nga ako silang gipangkwartahan.
Dihang nasulod ko sa maong grupo, misamot ka-estrikto ang pag-monitor sa mga sakop. Serbisyo publiko ra g’yod tawon ang amo nga pag-apil sa maong grupo, kami pa gani ang makagasto sa kaugalingon namo nga kwarta.
Kadtong mga opisyal sa TFA nga misugyot nga ikiha ang reporter nga nagsuwat sa balita, akong hangyoon nga kalimtan na lang ang maong isyu kay mora’g sipyat g’yod tawon pagsuwat sa reporter.
Aw kun moinsister g’yod hinoon si Rey nga “kusog nga mangwarta ug abusado” ang mga sakop sa TFA, kana moapil pa ko og pirma sa kaso nga ipasaka sa akong kauban.
* * *
Maayo nga hingusgan sa Department of Trade and Industry (DTI) ang paghimo’g kampanya batok sa mga Christmas lights nga “low standard” nga gibaligya diha sa lainlaing baligyaanan.
Kuyaw kini nga makamugna og sunog. Husto si Konsehal Arsenio Pacana nga kay hapit na man ang Pasko, angay’ng paspasan sa DTI ug sa mga fire inspectors ang paghimo’g kampanya.
Kanus-a pa man kita molihok, unya naba kun dunay mahitabo? Mentras tanto nga wala pa’y hitabo, angay’ng molihok na ta!