Giakusahan ang anak ni Cebu City Mayor Tomas Osmeña nga si Miguel nga nang-harass sa amiga sa iyang hinigugma dili pa lamang dugay. Midako na kini nga isyu tungod kay gisakyan na kini sa politika.
Tungod lagi kay ang na-involve sa maong kaso anak man sa labing dakong opisyal sa dakbayan, dili gayud malikayan nga sakyan kini sa politika. Ilabina nga nagsingabot nga ang eleksiyon.
Gani wala palabya ni Jonathan Guardo, usa sa mga haligi sa oposisyon sa dakbayan, ang maong isyu. “Kun unsa ang punoan mao usab ang bunga,” matud pa ni Guardo.
Hinuon, in fairness usab sa pamilya ni Mayor Osmeña, mora’g kini pa nga insidente nalambigit si Miguel. Wala ko makadungog og laing bayolente’ng insidente nga na-involve ang ngalan ni Miguel.
Sa laing bahin, wala pay klaro kun unsa gayud ang hinungdan sa giingong pag-pang-harass ni Miguel kang Samantha Elise Benitez, kinsa bestfriend sa iyang hinigugmang si Bea Villegas.
Aduna siguroy mas dakong rason nga nakapabukal sa dugo ni Miguel batok kang Miss Benitez ug siguro tipik lang kadtong iyang alegasyon nga bad influence kini sa iyang hinigugma.
Kun unsa man kana, wala pay ni usa nga nasayod. Bisan pa man, nahimo nga bad guy karon si Miguel. Napuno na siya ug si Mayor Osmeña sa mga batikos, ilabina gikan sa oposisyon ug sa uban pang kontra sa mayor.
Niining maong insidente, usa pa ka habig ang nadunggan sa publiko, ug kini mao ang habig ni Miss Benitez, kinsa daling nakadangop sa media aron pagtaho sa maong insidente.
Wala pa g’yuy ni usa ka statement gikan mismo ni Miguel. Atua pa kini sa Estados Unidos kauban sa iyang ginikanan. Hinuon, dali usab nga nakadepensa si Mayor Osmeña ug ang asawang si Margot kang Miguel.
Matud pa ni Mayor Osmeña nga inosente iyang anak sa maong hitabo. Gani, mihulga siyang iyang ikiha og libel kadtong nag-akusar sa iyang anak nga walay igong basihan.
Sa ako nang giingon, duol na ang eleksiyon ug siguradong usa na usab kini ka dakong isyu nga gamiton sa oposisyon batok sa kandidatura ni Mayor Osmeña sa sunod nga piniliay.
Adunay daghang indikasyon nga mokandidato ang mayor pagkakongresista sa south district. Ug kun modagan gayud siya, usa kining insidente nga gikalambigitan ni Miguel ang ihapak unya kaniya sa oposisyon.
* * *
Magsugod karong adlawa ang tinuig nga Press Freedom Week dinhi sa Sugbo. Ug sama sa naandan, ang selebrasyon magsugod pinaagi sa usa ka parada sa mga sakop sa media – pamantalaan, telebisyon ug radio.
Daghang mga forum ang gihan-ay sulod sa usa ka semanang selebrasyon sa kagawasan sa media sa nasud. Kining maong mga forum gitumong aron pagpalambo usab sa industriya sa media sa Sugbo.
Apan bisan pa sa atong gipanghambog nga grabe ang ka gawasnon sa mga mamahayag sa Pilipinas, padayon gihapon ang mga kaso sa pagpatay sa mga sakop sa media dinhi sa Pilipinas.
Gani ang Pilipinas anaa gihapon sa listahan sa mga nasud nga adunay daghang kaso sa pagpang-harass sa mga mamahayag. Karong tuiga lamang, ubay-ubay ka kaso sa pagpatay sa mga mamahayag ang natala dinhi sa nasud.
Hinaut nga adunay lakang ang industriya pagsumpo niining maong dili makatarunganong pagpangatake sa mga mamahayag.
Hinuon, walay perpektong mamahayag. Dili gayud malikayan sa matag reporter, editor, kolumnista ug komentarista nga usahay masayop sa ilang inadlaw-adlaw nga trabaho. Apan dili kana rason nga basta na lamang mopuo og kinabuhi kadtong mga naagrabyado.
Hinaut nga ang otoridad ug ang industriya makakab-ot og lakang nga makahunong na niining mga pagpangatake batok sa mga mamahayag sa Pilipinas.
* * *
Email: yacilam@yahoo.com