Ang mga mananambal, nutritionist ug researcher nagtuo nga ang sakit ug daling pagkatigulang maoy direktang resulta sa mineral deficiencies. Aron malikayan kini, mas maayong suplementohan og trace minerals ang purified water nga atong pagaimnon.
Ang trace mineral nga chromium makuha gikan sa mga liso, karne, brewer’s yeast ug mani. Makatabang kini aron ang lawas makapahimulos sa carbohydrates ug tambok; gibantayan niini ang lihok sa insulin ug glucose.
Ang copper makuha gikan sa tahong, imbaw, alimango, legumbre, nuts, whole grains ug patatas. Makatabang kini pagtibuok sa pulang selula sa dugo, mga tisyu ug motabang sa lawas pagsuyop sa iron.
Ang trace mineral nga flouride makuha gikan mismo sa tubig nga butangan niini ug sa mga pagkaon nga lutoon pinaagi niini. Makuha sab kini gikan sa delatang isda ug tsa. Motabang kini pag-absorb sa calcium. Motabang sab kini pagpalig-on sa mga ngipon ug kabukogan.
Ang trace mineral nga iodine makuha gikan sa iodized salt, seafoods, milk products, mga utanon nga gitanom sa yutang may iodine. Gikinahanglan kini aron maayo’g function ang mga selula ug thyroid gland. Gikinahanglan kini aron malikayan ang goiter.
Ang trace mineral nga iron makuha gikan sa pulang karne, atay, manok, isda, itlog, legumbre, grains, blackstrap molasses, green-leafy vegetables, ug sa mga pagkaon nga giluto sa kalderong puthaw ug aluminum. Motabang kini pagmugna og enerhiya ug hemoglobin nga maoy magdala og oxygen sa dugo ug sa myoglobin nga maoy magtipig sa oxygen diha sa kaunoran. (Sunod: Dugang tinubdan sa TM)