Kaniadtong miaging Domingo lima ang patay ug ubay-ubay ang nasamdan sa dihang miboto ang bomba sa gawas nga bahin sa Cathedral sa dakbayan sa Cotabato. Unya usa lang ka adlaw ang gipalabay, lain na usab nga bomba ang gipaboto dili halayo sa Cathedral sa Jolo, Sulu. Sa maong adlaw lain usab nga bomba ang gipaboto duol sa fish port sa Iligan. Ang maong sunod-sunod nga pagpamomba mikutlo og laing duha ka kinabuhi ug miangol sa daghan gihapong sibilyan ug militar.
Sa wa pa ang sunod-sunod nga pagpamomba sa Mindanao, daan nang gipabothan og bomba ang buhatan sa Ombudsman didto sa kaulohan nga miguba sa pipila ka bahin sa edipisyo. Gawas niini may dinamita usab nga gipaboto sa buhatan sa Department of Agriculture ug maayo na lang kay wa kini makabuto. Kining tanan nahitabo mga napulo ka bulan sa dili pa ang Poll automation sa tuig 2010. Unsa may buot ipasabot niini? Distabilisasyon na ba kini? Dili kaha Marcosian ang maong pagpamomba?
Samtang gibasol sa atong militar ngadto sa mga sakop sa Moro Islamic Liberation Front ang maong pagpamomba di baya usab nato kalikayan ang pagduda nga gihimo kini sa laing grupo alang sa pagduso sa ilang kagustohan.
Wa kaha tuyoa ang maong pagpamomba aron makakuha og rason ang administrasyon ni pangulong Arroyo nga ideklarar ang State of Emergency o ba kaha Marcial Law aron magpabilin siya sa puwesto? O ba kaha gituyo kini paghimo sa mga tawong dili ganahan nga adunay piniliay kay dili na sila makapanikas niini?
Kun dili man distabilisasyon ang tumong sa maong pagpamomba unsa man diay kaha ang tumong sa naghimo niini, terrorism? Mopatay lang gyod aron dunggon ang politikanhon nga interest sa grupo nga naghimo? Wa na ba gayod diay kanila ang pagrespeto sa pagka sagrado sa kinabuhi sa tawo? Nawagtang na ba diay sa pipila kanato ang pagka rational? Ingon ani na ba gayod diay kaubos ang atong moralidad kay sayon naman lang kutloon ang atong kinabuhi aron lang masulong ang politikanhong interest?
Dinhi lang sa ato duha ang patay sa duha ka managlahing tulis nga nahitabo sa dakbayan sa Mandaue ug Talisay tungod kay gipamatay sa mga tulisan? Porbida!