Giduwaduwaan lang sa pipila ka mga lider ning atong nasud ang hataas nga katungdanan nga mao ang presidency kon pagkapangulo.
Ang misulti niini dili usa ka batid nga tigpaniid sa politika kun dili usa ka ordinaryong babaye sa atong katilingban. Usa ka inahan.
Matud pa ning maong babaye (kang kansang pangan dili nato ikabutyag kay ato ra man siya nga nadunggan nga misulti’g bahin sa politika):
“Klaro sa atong batakang balaud nga ang Pangulo molingkod lang og usa ka termino apan ngano man nga bisan mahuman na ang katungdanan dili pa man buot nga manaog?”
Sayod kita kun kinsa ang iyang buot ipasabot. Ug apil sa iyang pagpanaway mao kadtong mga politiko nga mipaluyo sa maong Pangulo ug mihulhog pa gyud nga mangita’g paagi aron makapadayon sa pagkupot sa gahom.
Tinuod bitaw. Nganong dili man sundon ang anaa sa balaud? Tumanon unta aron kahatagan og pagtahod ang presidency nga maoy labing taas nga katungdanan sa atong pangagamhanan.