Dili na bag-o ang mga balita nga dunay mga sakyanan sa gobiyerno nga pasuyopan og gasolina sa mga drayber niini. Ang maong modus gitawag ni og “paihi.”
Sagad nato ni nga madunggan didto sa kaulohan nga masakpan sa mga imbistigasyon nga himuon sa mga programa sa telebisyon. Wa ko magdahom nga ang maong matang sa pagpangawat sa gasolina nahitabo diay dinhi sa atong kaugalingon nga probinsiya.
Niadtong Hunyo 1 usa ka kawani sa Kapitolyo ang nadakpan sa Mobile Patrol Group uban sa kakunsabo niini sa pagpangawat og krudo gikan sa sakyanan nga nadistino ni Bokal Peter John Calderon.
Si Ronald Gella Cariñoso, drayber ni Calderon, nasakpan uban sa usa ka Benchito Pingkian Gulbe nga mipasuyop sa krudo sa Toyota Hilux nga maoy service vehicle sa mga provincial board members.
Gibanabana nga mokabat sa 30 litros kon mokantidad og P1,000 ang nasuyop sa mga suspetsado gikan sa sakyanan sa gobyerno. Gidala ni Cariñoso ang sakyanan didto sa Unit 5 sa Oprra ug didto gisuyop ang krudo.
Sumala pa nga gibaligya niini ang krudo ngadto kang Gulbe.
Ang piskaliya mipasaka na og kaso nga qualified theft batok ni Cariñoso ug ni Gulbe didto sa hukmanan diin P10 mil matag-usa ang girekomendar nga piyansa alang sa ilang temporaryo nga kagawasan.
Sigurado ko nga dugay na ang maong pagpangawat og krudo diha sa mga sakyanan sa Kapitolyo. Hinaot nga ang pagkadakop ni Cariñoso magsilbi ni nga pahimangno sa uban nga susama niya og binuhatan.
* * *
Niabang na og opisina ang tigpautang nga si Victor Yu diha duol sa Palace of Justice. Kini human siya nakasugat og pagsaway sa mga sakop sa media tungod sa iyang paggamit sa opisina sa gobyerno sa iyang pribado nga negosyo.
Salamat nga sensitibo si Mr. Yu sa mga pagsaway ug gidawat niini ang atong sugyot nga mag-abang og opisina aron di siya mamurhisyo sa mga buhatan sa gobyerno.
Maayo ni nga tilimad-on ang iyang gihimo. Apan duna lang koy dugang hangyo ni Mr. Yu total iya naman nga gisugdan ang pagsanong palihog hunonga na sab ang pagpamugos sa mga mohuwam og kwarta gikan nimo nga mopalit sa imong baligya nga sabon.
Daghan man god ang nireklamo nga mga kawani sa Korte nga nakahuwam og kwarta niya tungod sa kawad-on nga pugson sila sa pagpapalit og sabon. Sumala pa nga pananglit kun mangutang ka og usa ka libo ka pisos gikan ni Mr. Yu P900 ray iyang ihatag nimo tungod kay ang usa ka gatos sabon maoy iyang ihatag o ba kaha bisan unsa nga produkto nga iyang baligya.
Alang nako pagpahimus ni sa higayon ug sa kawad-on sa mga kawani nga way laing kapaingnan gawas sa pagpangutang. Wa may dautan kun mamaligya apan ayaw pugsa ang tawo nga mopalit gyud og sabon kay kun dili di sab pautangon.
* * *
Email:fplanguido@yahoo.com