Sa wala pa misaka sa langit ang atong Ginoo, iyang gipadala ang iyang mga tinun-an alang sa usa ka mahinungdanong tahas sa pagsangyaw sa maayong balita ngadto sa tanang suok sa kalibutan. Uban ning maong mga buhat mao ang mga timaan sa gahom nga naghimo sa ilang pagpanudlo nga mas katuohan ug kasaligan.
Nahimong kabahin na sa kalihukan diha sa pag-ebanghelyo sa atong simbahan ang pagpadala og mga misyonero ug mga misyonera sa mga nagkalain-lain suok sa kalibutan. Tumong niini ang pagsabod sa binhi sa maayong balita sa mga nagkadaiyang kultura. Apan lagi tungod sa mga limitasyon sama pananglit sa gidaghanon sa mga misyonero ingon man sa gilay-on sa mga teritorya sa misyon, nahimong daw malisud ang pagpalig-on sa pag-implementar sa mga misyonaryong panlantaw sa Simbahan. Salamat na lang sa modernong kahimanan sa komunikasyon. Nahimong nakasulod ang mensahe sa Ebanghelyo nagkalain-laing kultura ug nasud. Ang mga websites, tv channels, print media ug gani bisan ang mga cellphones nahimo namang kahimanan ning maong mithi sa pag-ebanghelyo. Ug gani karong panahona, nahimong makahatag ang usa ka tawo sa iyang tambag ingon man panahom espirituwal diha sa mga chatrooms ug e-mails sa internet. Mao nga tukma lang nga ang simbahan mogamit ning maong mga kahimanan sa komunikasyon aron mamahimong epektibong lumilihok sa reyal ug sa birtwal nga kalibutan. Ang paghimo sa Simbahan nga usa ka Media Church ang dako kaayo og kahimoan aron mapadayag niya ang mga mahinungdanong punto sa tinuhoan ginamit ang pinulongan ug pamaagi sa secular media.