Maayong tilimad-on alang sa kausaban ang pagtunga karon ning grupo sa mga batan-on nga nag-awhag sa mga sama nila og pangidaron nga magparehistro aron mamahimong makabotar ning nagsingabot nga bugnong lugaynon. Kini tungod kay kun dili lang mangiyugpos ug magbarog sa iyang nakitang suliran ang mga batan-on dako sila og ikatampo sa kausaban sa nasud.
Sa daghang suliran nga giatubang karon sa nasud sama sa kawad-on, kakuwang sa trabaho, drugas, prostitution, pag abuso sa gahom ug pag-ubos sa dignidad ug moralidad sa katawhan ug mga pangulo sa nasud ug daghan pa, panahon na seguro ang paglihok sa mga batan-on. Di na seguro paabuton pa sa mga batan-on ang paghingkod sa ilang mga pangidaron kun gusto man niining mahatagan og kausaban ang katilingban nga madaug-daugon ug malupigon.
Ang kabatan-onan giila sa atong batakang balaud nga katambayayong sa pagpabarog sa lig-ong bantayog sa nasud busa panahon na nga himuon niini ang maong hagit nga daan nang nakapatong sa ilang abaga. Pagpakabana ug panginlabot ilabi na sa mga suliran nga inyong nakita ug makita. Himoa ang inyong kaugalingon nga kabahin ug katambayayong sa kasulbaran sa mga suliran. Ayaw himoa ang inyong kaugalingon nga mamahimong kabahin sa suliran.
Pahinumdom ko lang sa mga batan-on nga misugod na sa pagpakabana likaye ang mga politiko nga mopahimulos unya sa maayo ninyong mga tinguha. Sa inyong pagpili ning umaabot nga bugnong lugaynon, maoy pilia ang mga lider, ayaw pilia o likaye ang pagpili sa mga politiko..