Sa dihang gihisgut-hisgotan pa ang gitawag nga Cheaper Medicine Bill masaligon ang kagamhanan nga inigpasar niining maong balaudnon makaginhawa na ang mga masakitong Pilipino nga sa dugay’ng panahon nag-antos dili lang sa ilang balatian kundili usab sa kamahal sa tambal.
Karon kay nahimo nang balaud ang balaud-non -- Republic Act 9502 na -- nabarato ba ang tambal nga maoy tumong nga kab-uton sa balaud?
Bisan kinsa ang patubagon niining pangutana motubag lang dayon nga: “Asa ka barato? Mimahal man gani ang ubang medisina.”
Kining Cheaper Medicine Law usa sa mga maayong balaud nga napanday sa Kongreso apan kuwang ra sa pagduso. Dili mahimong pasagdan na lang kini, kay abi balaud na; kinahanglan ang kusganong pagpatuman niini sa mga hintungdang ahensiya sa gobiyerno.