Dihay texter nga mipadangat og impormasyon dinhi sa Modus kabahin sa pagpayuhot og drugas sa brgy. Cogon, Cordova. Dihang napatik ang iyang sumbong, nakadawat ko’g text gikan sa cell. no. 0928-9012121 nga nagpaila nga siya si Brgy. Capt. Dinoy.
Ang iyang text nagkanayon: "Good AM, Sir. Walay nagpayuhot og drugas sa brgy. Cogon, Cordova kay ako mismo ang personal nga mobadlong ug mangulo sa raid. Palihog ko check sa inyong texter kun unsa ka tinuod. Thanks. Si brgy. capt. Dinoy ni."
Nalipay ko, Kap, nga wala ka magpabaya sa imong katungdanan. Pero ayaw lang paneguro nga wala gyo’y nagpayuhot og drugas diha sa imong barangay, as in drug-free kini. Lisod tuohan nga may dapit pang drug-free karong panahona. Ako mismo dili motuo niini bisan pag ang kinatas-ang opisyal pa’s kapolisan ang mosulti kay nakaabot na man gani ang ginadiling drugas sa hilit nga mga dapit. Ang inyong barangay pa kahay dili ma-penetrate sa mga pusher?
Kun may aso, adunay kalayo. Ang text nga gipadangat sa usa ka texter dinhi sa akong lindog nga naghisgot bahin sa pagpayuhot og drugas diha sa Cogon angay nimong hatagan og konsiderasyon sa dili ka pa mohimo’g konklusyon. Kinsay nasayod nga ikaw ray gibantayan sa mga tigpayuhot.
Mas maayong paladman ninyo ang inyong monitoring. Malipay ang tanan kun walay magpayuhot og drugas diha sa Cogon. Pero dili gyod maayong mokompiyansa. Ni-appreciate ko sa inyong pagpakabana bahin sa pagsumpo sa ginadiling drugas pero dili kini garantiya nga dili gyod mo malutsan sa mga badlongon sa katilingban.
* * *
"Good AM, Sir. Puyde ba diay nga ang 13th month pay i-by batch ang pagpanghatag? Mao niy gibuhat sa among agency." -- 0929-2640099
Ang paghatag sa 13th month pay gimbut-an sa balaod. Ug sumala sa balaod, kinahanglang ihatag kini sa dili pa ang Pasko o December 25.
Kun ang usa ka employer manghatag na’g 13th month pay ngadto sa uban, kinahanglang hatagan niya ang tanan sa samang higayon.
* * *
(Sumbong ug reklamo? Text sa 0910-8105522).