Dili maayo ang gihimo ni Mayor Tomas Osmeña nga gidayeg na hinuon niya si Miss Cebu 2009 Kris Tiffany Janson ug gisaway ang pamilyang Burden mahitungod sa isyu sa Globe Texter’s Choice Award.
Ang pagdayeg ni Tommy sa mga Janson gibasi tungod sa pagpakahilom ug wala gayod motubag ang mga Janson sa isyu nga gisumsoman na sa katawhan diin siya si Kris midawat sa award bisan dili siya maoy winner sa texter’s choice sa beauty pageant kaniadtong Enero 14.
Ang pagpakahilom sa mga Janson daw masabot pa gani nga kwestyonable ang pagdawat unta nila sa award – nga tinuod ang report nga bisan og nasayod na silang daan nga si Kimberly Therese Burden maoy tinuod nga midaug sa texter’s choice.
Kun wala’y gusto si Tommy nga taktakon sa pagka komisyoner sa Cebu City Tourism Commission si Philipp Rodriguez, iya kini nga katungod apan subra ra kaayo nga iya pang gipakapinan pinaagi sa pag-ingon nga “Miss Cellphone” ra si Kim.
* * *
Ning milabay’ng mga adlaw, gapusot-pusot ang daghang text messages nga nadawat sa akong cellphone gikan sa mga drayber sa PUJ ug tingali gikan usab sa ilang mga pamilya.
Mireklamo sila tungod sa kadagko sa multahan nga gipatuman karon sa Land Transportation Office alang sa mga madakpan. Bitaw, dagko na g’yod kaayo ang multahan.
Apan nganong bisan og dagko na kaayo ang multahan sa madakpan nga drayber, daghan man gihapong moabuso nga bisan unsaon pag-awhag nga dili mohimo’g kalapasan, ibaliwala lang ang awhag?
Sa ato pa, gusto g’yod tingali sila nga makabayad, daghan ra tingali ang ilang kwarta. Pila na ka higayon nga kining akong lindog akong gigahin aron pagpahibalo kanila kay nalooy ko.
Daghan pa gihapon sa mga motorsiklo nga gigamit isip “habal-habal” diri sa Busay, Lahug ug Capitol Site ang walay side mirror, samtang ang ubang drayber mga batan-on.
Kini maoy timan-i. Masakpan gani kamo nga magmaneho og sakyanan nga walay lisensya, ma-impound g’yod ang inyong sakyanan.
Atul sa mga operation sa LTO-Task Force Alpha, daghan g’yod sa mga madakpan ang mohangyo nga dili sila isyuhan og TOP, apan uwahi na kay gihuwat man nila ang panahon nga sila madakpan.
Usbon nako, kamong mga drayber sa PUJ, siguroa nga ang sakyanan nga inyong gimaneho, kompleto sa rehistro nga wala pa mo-expire, unya hitsas kini sa suga ug ubang kahimanan.
Ang pamahayag sa mga mipadangat nako og reklamo nga ngano kuno nga silang mga drayber maoy gihingusgan ug dili man ang mga kawatan, gitawag kini og walay basihanan.
Ang LTO maoy gitugyanan pagpanakop sa mga drayber ug tag-iya sa mga sakyanan nga wala motuman sa balaud sa transportasyon ug ang kapolisan maoy gitahasan pagdakop sa mga kriminal ug mga kawatan.
Samtang makadakop ang bisan kinsa – ubos sa gitawag og citizens arrest – apan wala tuguti ang Task Force Alpha sa paghimo’g operasyon aron pangitaon kadtong mga nakahimo’g salaud nga mora na sila og polis kay makalapas na sila sa Article 177 sa Revised Penal Code.
Ang akong ikasulti mao ni, swerte lang ang LTO nga dunay Task Force Alpha nga abtik kaayo ang mga sakop nga mohimo’g operation sa pagpanakop sa mga masalaypong drayber.
Akong balikon, kamong nagmaneho og motorsiklo ug ubang matang sa sakyanan, siguroa nga dunay side mirror ang inyong sakyanan, unya magsuga mo sa gabii aron dili kamo madakpan ug makamulta og dagko.