Niay text gikan sa nagpailang si Carlo sa Samboan, Cebu. Ang iyang sentimento mahitungod sa sentro sa panglawas sa lungsod sa Samboan.
Ang iyang text nagkanayon: "Sir, naa nay patakaran diri sa Samboan nga kadtong manganak adto na gyod sa sentro. Di na puyde sa balay. Ang nakakuyaw kay walay saktong gamit ang sentro. Walay oxygen. Naay tangke pero way sulod. Kulang gyod sila’g kagamitan sa panganak. Naa pay doktora nga dili mo-check up kun way saging usa ka bulig ihatag. Dili ka atubangon. Labay-labayan ra ka. Pero kun naa kay saging ug lubi nga butong usa ka bulig atubangon ka dayon. By Carlo of Samboan, Cebu." -- 0909-8718396
Angay hitsasan sa gamit ang sentro sa Samboan aron makaserbisyo kini sa mga molupyo sa maong lungsod sa labing epektibong paagi.
Kanang pasangil nga dili atimanon sa doktor ang pasyente nga dili magdalag saging o lubi, dili lang una ko mokomentaryo bahin niana. Hinuon, hatagan nakog higayon ang kadumalahan sa sentro sa Samboan sa pagpatin-aw sa ilang habig.
Ipatik sab nato dinhi ang reaksiyon sa mga tagdumala sa sentro sa Samboan, Cebu. Mas maayong maka-explain sila sa ilang side.
* * *
"Unsay kasong ipasaka ining CI sa Gaisano South nga kapkapan tag kalit kun padung ta mogawas? Paalihan ta sa guard bisag wa ta mangawat. Panaghapay ug pataka lang sila." -- 0905-9628139
Mosunod lang ta sa house rules kun mosulod tag usa ka establisamento. Dili man sab ta angay mahasol kun kapkapan ta kun wala ta mangawat sa mga butang sulod sa maong establisamento, dili ba?
Hinuon, morag makatibhang sa atong convenience pagsulod sa usa ka establisamento kun madudahan tang nangawat. Mora sab og insulto kini. Apan kun wala lang malapas ang atong katungod, dili man tingali angay ikasakit nato kun kapkapan ta.
Ang mga CI igo lang nagtuman sa ilang trabaho. Gi-train sab kana sila unsaon pagbasa sa lihok sa tawo nga naghimog daotan. Mao nga dili lang nato ikahimangod kun kapkapan ta basta dili lang bayolente ang paghimo nila sa ingon.
* * *
(Sumbong ug reklamo? Text sa 0910-8105522).