Kagahapong adlawa gisaulog sa nasud ang ika -23 ka tuig nga kasumaran sa People Power One.
Alang sa mga bag-ong tubo nga wa masayod sa makasaysayanong lihok sa katawhan, ang People Power One mao ang dili dugoon nga rebulosyon. Bunga kini sa abuso sa gahom, pagpangurakot ug tikas sa bugnong lugaynon.
Tungod sa pag-abuso sa iyang gahom, pagpangurakot sa bahandi sa nasud ug pagpanikas sa resulta sa bugnong lugaynon, ang katawhan nga wa na makaagwanta naghiusa sa pagpalagpot ni Ferdinand Edralin Marcos sa iyang lingkoranan sa Malakanyang.
Gamit ang mga rosas ug mga rosaryohan ingon man mga pag-ampo sa katawhan, way bisan usa ka sumbohan sa armas sa mga sundawo nga gipadala ni Marcos ang miboto aron pohagon ang mga tawong nagtapok sa Epifanio Delos Santos Avenue kon Edsa. Way ligid sa tangke de gera ang milatay sa lawas sa mga madre, pari, seminarista ug katawhan nga nanghigda sa dalan aron pugngan ang mga sundawo ni Marcos sa pag-ataki sa kampo Crame ug kampo Aguinaldo nga gitagoan sa mga sundawong mibiya na sa iyang poder.
Ang People Power One giila sa tibook kalibutan gani nahimo kining sumbanan sa panaghiusa sa nasud sa Germany ug pagkabungkag sa Yugoslavia.
Ang People Power One gikalipay sa katawhan kay napalagpot ang diktador, abusado sa gahom, korakot ug tikasan sa bugnong lugaynon. Gikalipay kini sa katawhan sa pagtoo nga mao na kadto ang katapusan sa mga abusado sa gahom, mga kurakot ug tikasan sa bugnong lugaynon. Apan 23 ka tuig ang nakalabay napuno ang katawhan sa mga pagmahay tungod kay gawas nga wa lang mawagtang ang nahisgutang suliran, misamot pa gayod kini sa paglipang.