"Sir, naay kompaniya diri sa Cebu nga way klaro mohatag og suweldo. Pilion ra nila kun kinsay una nilang suweldohan. Unsaon na lang ming mga pamilyado na? Giunhan na gani mi nila’g ingon nga kun moreklamo mi maayo pa moundang na lang og work. Aron kuno dili na sila makabayad sa among retirement fee. Usa ni ka restaurant nga exclusive sa mga foreigner." -- 0920-4955074
Dakong tinonto ang gihimo sa inyong employer. Dili makatarunganon nga pilion ra nila ang una nilang suweldohan. Diin god intawon sila makabasa nga may balaod nga nagtugot niana?
Ang maayo ninyong buhaton mao nga modangop mo sa buhatan sa DOLE. Mas maayo kun maghugpong mo pagbarog batok sa inyong employer aron mas dako ang inyong tingog!
* * *
"Maayong adlaw, Sir. Daghan kaayong mga kawatan diha sa Colon diin moagi ang mga sakyanan biyaheg Bulacao. Magkapyot-kapyot sa sakyanan. Klaro na baya kaayo ang ilang modus." -- 0928-6077319
Atong awhagon ang atong kaigsuonang sumasakay sa mga PUJ nga magbantay nianang mga lalaki nga mokapyot sa mga sakyanan bisan kun may bakante pang lingkoranan sa sulod sa sakyanan. Mga kawatan kanang maong mga tawo nga mangita lang og tukmang tayming.
Ang kasagaran nga kapyotanan nianang mga tawhana mao ang mga PUJ nga mobiyaheg Bulacao. Anha sila moangkas sa may Colon area. Bantayi!
* * *
Sa miaging Pasko duna koy nasinating dili maayo didto sa Ubay, Bohol. Gikawat ang among mga sinilas sa mga bata nga nanaygon. Pagka walay batasan. Salbahis nga mga mananaygon!
Diha say hut-ong sa mga hamtong nga mananaygon (sa Ubay gihapon) nga masuko kun dili hatagan og kuwarta. Unta kuno mipasidaan ang ilang gidaygonan nga dili mohatag kay dili na lang sila manganta.
Kahilas! Maayo mag gisugo sila sa pagpanaygon! O kaha gisugo sa tagbalay sa pagpanaygon. Klaro nga sa ilang gibuhat, wala nila dad-a ang spirit of Christmas kay masuko man kun dili mohatag og kuwarta ang ilang gidaygonan.
* * *
(Sumbong ug reklamo? Text sa 0910-8105522).