"Diri ba sa brgy. Tinago, Cebu City daghan kaayo ang mga bata nga magsige og gamit og rugby. Bisan mga 5 years old pa gani naghingoshingos na anang rugby. Wala gyud makabadlong ang mga ginikanan. Masuko hinuon sila kun badlongon ang ilang anak. Unta mahimoan pod ni’g aksiyon sa mga opisyal sa barangay." -- 0918-7727837
Kun tinuod ning gitaho sa atong texter, nagpasabot lang kini nga duna gyu’y mga ginikanan nga nagpabaya sa ilang mga katungdanan ngadto sa ilang mga anak.
Aduna man gani ubang ginikanan nga ang mga reading materials maoy basulon kun maghimog dautan ang ilang mga anak. Pagkatuytoy! Mora ba’g wala sila makaamgo nga ilang katungdanan ang pag-agak sa ilang mga anak ug dili kay isalig nila sa media ang pagdisiplina niini!
Buyno, mas maayong maaksiyonan sab sa mga brgy. opisyal ug tanod sa Tinago kining gitaho sa atong texter.
* * *
"Good day, Sir. Naay mga traysikad driver diri sa Villa Leyson Subdivision nga mo-drive bisan makainom og liquor. Inigkagabii magsugal silag hantak. Pati ning mga tricycle driver maghantak sab diha mismo sa basketball court atbang ra sa balay sa usa ka poils nga na-assign sa Talamban police station. Naghitak ang sugal diri. I'm Cesar." -- 0906-4957942
Kuyaw kaayo kun mo-drive og traysikad ang usa ka driver nga hubog. Ayaw mo’g sakay sa ilang traysikad kay kuyaw kana sa disgrasya. Mas maayong mabadlong sab sila sa proper authorities. Ireklamo kana ninyo ngadto sa mga opisyal sa barangay.
Kanang bahin sa hantak, illegal gambling kana ug busa angay sab nang himoan og tukmang aksiyon sa mga opisyal sa barangay. Mas maayong palihukon nila ang ilang mga tanod.
Mas maayo sab unta kun manginlabot niini ang kapolisan, labina kanang polis nga, sumala sa atong texter, naa magpuyo duol sa basketbolan diha sa Villa Leyson Subdivision.
Palihug lang, mga Sir ... aksiyoni...!
* * *
(Sumbong ug reklamo? Text sa 0910-8105522).