Pagkapalautang baya gyud nato uy! Hinumdum ko nga usa sa atong nasuk-an ni Marcos mao ang iyang pagkapalautang. Niadtong panahona, suko kaayo ta sa mga minilyon nga utangon ni Marcos, ug pila lang ka bilyon ka pesos ang total natong utang here and abroad.
Karon, dugay na kaayong na-waa si Marcos, unsa man? Unta, tungod kay na-waa na si Marcos, pakapinan pa sa pagka-waa ni Erap, hayahay na unta kaayo karon ang atong pagkabutang.
Usa ka man ka economic analyst, Dro, suwayi konog analyze kining atong pagkabutang karon. Misamot ka daku ang atong utang, ug hapit katunga sa atong national budget (P1.4 trillion) ang gigahin aron ibayad sa atong mga utang.
Hain man paingon ang buhis? Nganong di man ta makalihok og dinagko kun di ta mangutang? Karong bag-o, ang Monetary Board miaprobar nga mangutang na sad tag 232 milyones ka dolyar (ikaw na lay multiply ini Dro kun pila ni ka pesos) gikan sa World Bank.
Ug sama sa panahon ni Marcos moingon dayon ta nga tungod kay magpautang pa man sila, nagpasabot nga maayo tag record isip palautang. Hala sige, pasagdan ta lang na sila, Dro, di man silay mobayad.
Ang salapi gamiton alang sa National Roads Improvement Management Program sa atong kagamhanan. Maayo. Daghanang kwarta ini no? Asa kaha paingon ang uban ini?
Pag-dirty gyud sa atong mga hunahuna uy! Makadungog gani tag kwarta nga daghan kaayo, corruption dayon ang masulod sa atong ulo. Ambut ngano.
Ang maong utang pagabayran sulod sa 25 ka tuig, uban sa napulo ka tuig nga grace period. 25 ka tuig nga obligasyon niining particular nga utang. Sa ato pa, uban sa existing nga mga utang, ang ato nang mga apo sa tuhod ug ilang mga apo maoy magbaguod og bayad niini. What a legacy? What an inheritance?