Daghan nang mga panghitabo diin nanira ang mga bangko, dili lang dinhi sa ato kundili usab sa ubang dapit sa nasud, gumikan sa dili maayong pagpadagan niini.
Kasagaran sa maong mga bangko matawag tang gagmay ug ang mga mipatronisar niini gagmay usab nga mga depositor.
Luoy kaayo ang maong mga depositor nga sa ilang pagmata sa buntag sugaton lag balita nga ang ilang hinipusan “nadisgrasya.”
Suma sa atong banking law ang mga depositor sa bangko gihatagan og proteksiyon. Tingali angay’ng rebiyuhon ang mga lagda bahin niini aron kapangitaan og mga paagi nga mapalig-on pa gayud ang proteksiyon nga ihatag ngadto sa mga depositor ilabi na kadtong mga gagmay’ng kliyente.