Gikan sa cellphone number 0927-6765978: "Kanang mga enforcer sa Consolacion grabe ... Kusog kaayo manakop unya mangayo og kuwarta. Kun dili mohatag ang driver hulgaon dayon nga isyuhan og TOP. Mao nga mohatag na lang intawon ang mga driver og P100. Unya moingon nga 'naay akong mga kauban sa unahan. Ingna nga nihatag na ka diri.' Pero inig-abot sa unahan dakop na sab. Mangayo gihapon og kuwarta kay lain sad kuno ang ila. Grabe, uy!" -- (Sent: 08:40:15 am--September 2, 2008)Kun maoy atong basehan sa atong texter, makaingon tang nanguwarta ang mga enforcer diha sa Consolacion. Ang pag-isyug TOP maoy ligdong nga pagpatuman sa balaod, dili ang "off the record" nga sabot-sabot nga maglambigit og kuwarta.
Tuod, moisyu bag resibo ang mga enforcer nga manakop ninyo human kamo makahatag og P100? Kun wala, posible gyod nga nahulog ang inyong gihatag nga kuwarta sa kaugalingon nilang bolsa.
Angay ning subayon sa traffic division sa Consolacion municipal hall aron masuta kun tinuod ba kini o dili. Angay sab pasabton sa mga enforcer ang mga driver kun alang sa unsa man ang P100 nga ilang pangayoon aron dili magduda ang atong mga tsuper diha nga gipanguwarta sila sa mga tigpatuman sa balaod sa trapiko diha sa Consolacion.
* * *
"Sir, naay mga mamasurahay nga mag-drive og sikad. Lansis lang diay nang ilang pamasura kay mangawat diay na sila’g manok (hiniktan), kaldero ug uban pa basta mabaligya (mahalin). Naa ni sa Cambaro. Kaadlawon na sila manguli sa ilaha. Saba kaayo. Unya naa pa gyoy daghang rugby boys sa ilang balay." -- 0921-3559867 (Sent: 01:39:4e5 pm--Sept. 2, 2008)
Bantayanan kining maong mga mamasurahay kun tinuod ang pasangil sa atong texter. Tiaw ba nga gihimo man lang diay nilang plantalya ang pagpamasura!
Labaw nang angay gyod silang bantayan kun tinuod nga nalambigit sila sa kalihokan nga may kalabotan sa paghingos og rugby.
Pagbantay kamo niini.
* * *
(Sumbong ug reklamo? Text sa 0910-8105522)