Akong higala nga nagpuyo sa Looc, Mandaue City misumbong nako mahitungod sa iyang nasinati atol sa iyang pagsuroy sa usa ka dakong mall diha sa reclamation area.
Niya pa, naay usa ka lalaki diha sa gawas nga bahin sa mall nga mosugat sa mga tawo nga gustong mag-atang og taxi nga kasakyan. Motanyag kuno ang maong lalaki sa baligya niining kuwentas. Isekreto ra ba gyod kuno ang pagtanyag.
Nagduda ang akong higala nga isnatser ang maong lalaki. Makapaduda gyod kuno ang lihok niini samtang nagtanyag sa baligya niining kuwentas. Mas maayo tingaling subayon sa mga awtoridad ang kalihokan niining tawhana.
* * *
Sa Opon, padayong gireklamo kanang mga mamaligyaay og kandela nga gipasanginlang "mangilad" sa mga managkotay.
Matud pa sa mga pasangil, kun mopalit kag kandela kay managkot, hatagan kag pakapin nga dakong kandela. Dili pabayran. Pero sa higayon nga imo na kining madagkotan, paninglan ka nag P20 ngadto sa P30.
Unsa man kaha kini ka tinuod? Kun tinuod man ugaling kini, mas maayong mabadlong kini sa proper authorities.
* * *
Diha sab sa gawas nga bahin sa Basilica del Sto. Niño, naa say gireklamo sa mga tawo nga usa ka manindahay og religious items.
Ang maong vendor gipasanginlan nga mosugat sa maglakaw nga mga tawo ug walay pupananghid nga mo-pin o motaod sa usa ka gamay nga religious item sa sapot sa tawong sugaton niini.
Pagkahuman, mangayo og bayad ang maong vendor. Mamugos gyod. Dili magpabalibad kay nabutang na kuno niya ang item sa sinina sa tawo. Maong mangayo gyod siyag bayad.
Unsa man ning kalakiha? Hangyo-lubo? Ireklamo kana ninyo ngadto sa polis o brgy. tanod, uy!
* * *
(Sumbong ug reklamo? Text sa 0910-8105522)