Gumikan sa kabangis sa ruling sa COA, hangtud karon, wa pay klaro kun unsay nahitabo sa gisaad nga Birthday ug Christmas gifts alang sa mga senior citizen sa dakbayan sa Sugbo. Lahi sa Makati City nga nagbaha ang mga kaayohan ug mga benepisyo nga gitunol sa dakbayan ngadto sa ilang mga senior citizen.
Lainlain tingalig ruling ang COA sa nagkalainlaing dapit. Kay sa Lapulapu City, pananglitan, morag di sad mahinayon ang tabang ni Mayor Boy Radaza ngadto sa banay ni San Roque Multi-Purpose Cooperative gumikan sa pagdili sa COA.
Ingonman, mora na pod og dili na makatabang ang kagamhanan sa dakbayan sa Sugbo sa kasaulogan sa Sinulog. Sa ato pa, kun ang COA maoy pabut-on, kanselahon na ang Sinulog tungod kay di na man papanginlabuton ang local government sa Sugbo sa maong celebration.
Ug lagmit, mao sad ni ang mahitabo sa Ati-Atihan, sa Sinadyang, ug ubang susamang celebration sa nagkalainlaing dapit sa nasud, kaylagi, di na man pagastuon ang gobiyerno sa mga kalihokan nga sama niini. Dimalasa sa turismo no? Kun buot hunahunaon, panagtambayayong kini sa gobiyerno ug sa private sector pagpalambo sa turismo. Apan mao may gusto sa COA nga pasagdan ang private sector ug mangiyugpos na lang ang gobiyerno.
Sa ato pa, dugang sa separation of church and state, mao sad tingali ang gusto sa COA nga i-separate usab ang private sector ug ang state.
Anyway, maayo man gani kay nagsugod nag pamunga ang SRP, gawas kun langan-langanon na usab sa COA ang ilang pag-review sa tinguha sa FILINVEST pag-put-up og dakung proyekto sa SRP.
Sa pag-kickoff sa Senior Citizens Month sa dakbayan sa Sugbo, gisaad ni Mayor Tomas Osmeña nga ang unang makapahimos sa bunga sa SRP mao ang mga senior citizen sa dakbayan sa Sugbo. Hilabihang pakpak ug hilabihang lipaya sa mga senior citizen nga naminaw sa mayor, kinsa bag-o lang nga na-senior citizen himself.
Maoy iyang saad nga before his term ends in 2010, mapahimuslan na ang SRP sa katawhan sa Sugbo. Gawas kun dunggon ang mga pag-ampo sa iyang mga kaatbang nga wala unay mo-invest sa maong proyekto, at least during his term. Pagka-wa sad natoy puangod usahay uy!
In the meantime, Dro, suwayi nog pangutana ang COA unsaon nila nga makadawat gyud ang mga senior citizen sa gisaad nga Brithday ug Christmas gifts.